Di 97710 auto cu tin registra 90% a cumpli cu pago completo di belasting 2025

Meverly Romano PR di DIMP:

• 3796 a paga mita so y 5299 no a paga nada mes 

ORANJESTAD (AAN) E Relacionista Publico di Departamento di Belasting, señora Meverly Romano, den su entrevista cu Matutino DIARIO, a elabora tocante loke cifranan ta mustra, encuanto pago di plach’i numbernan.

“Cifranan a papia pa su mes tambe. Na e momentonan aki nos tin 97710 vehiculo registra. Di e 97710 aki, 90%, esta 88272, cumpli cu e pago di belasting di vehiculo di motor di aña 2025, completamente. Y nos ta aprecia y gradici e grupo aki cu ta 90% cu a cumpli debidamente cu nan deber.

Y e otro parti cu falta pa paga ainda, di aña 2025, nos tin un total di 3796 vehiculo cu a paga solamente e prome mita di aña, y no a paga e otro mita di aña. Y nos tin un grupo di 5299 number cu no tin pago mes di aña 2025 registra.

Esey ta haci cu na e momentonan aki, pa loke ta trata e aña fiscal di 2025, nos tin un total di 9095 number cu ta ‘non complier’. Pues, no tin e cumplimento debi di aña 2025 pa loke ta trata vehiculo di motor”, señora Romano a menciona.

   Kiermen, nos tin 3796 cu a paga mita di aña so, y 5299 cu no a paga nada mes, locual ta haci e 9095 ‘non complier’. Y e 9095 aki nos ta kere cu nan ta riba caminda, y esaki ta e grupo cu gran parti no tin e plachi ainda, sigur e 5299 cu no a paga nada mes, no tin e plachi blauw cu blanco ainda”, Meverly Romano a reitera.

  El a remarca cu p’esey tambe por wak cu tin autonan riba caminda cu ta core ainda cu e plachi cora cu blanco y hasta orange, y esey sigur no ta na su lugar.

“Sorry pa bisa, pero esaki no ta culpa di DIMP. Dimp a anuncia aña pasa cu ta bin control, tur hende cu na e momento ey tabata tin cita nos a percura pa yuda nan, y na e momentonan aki esnan cu ta hayando nan plachi ta esnan cu awo nan a paga, awo nan ta haci nan cita, pero e cantidad ta hopi tiki”, Romano a reitera.

   Señora Meverly Romano, finalmente e expresa cu semper tin un grupo cu no ta worry; e aña aki ta miho cu otro añanan pasobra tin plachi nobo. El a reitera cu aworaki tin 90% ca cumpli, 9% cu no a cumpli, y e otro 1% a entrega nan plachi pasobra nan vehiculo no ta den uso.