ORANJESTAD (AAN): Dialuna mainta prome cu 8:30 am, Central di Polis a dirigi diferente unidad pa Shiribana 9-C na e establecimento di Lox Sing Supermarket,
unda un atraco a tuma lugar. E Supermarket aki ta riba caminda principal di Paradera pa Tanki Leendert.
Polis a yega y topa cu e comerciante Asiatico, kende a bisa cu debi na un descuido, el a laga e Cash Register medio-habri. Net e ora ey e homber conoci como tal ‘Colombia’, cu a drenta paden y su wowonan a dal manera magneet riba e caha di placa. Cu reaccion rapido, cu su man el a rek y pasa man pa varios placa di papel, y core sali bek.
E señora cahera a bati alarma, y a playback e video y a mira cu e homber a djis cana bay y drenta den cas Shiribana 9-B.
Polis di Noord y di Santa Cruz a yega, y hunto nan a drenta e cas aki. Instantaneamente nan a topa cu e homber aki, cu e cashier a describi, esta un persona hoben, cuero bruin, y bisti cu petchi. E sa wordo mira ta ‘slenter’ hopi den Shiribana, Tanki Leendert, Paradera, Nuñe, y Pavia.
E tal ‘Colombia’ a keda deteni, y su tas a wordo confisca. El a wordo hiba pa Warda di Polis pa asina investigacion start.
