Detencion Ministro Glenbert Croes den porta di eleccion

Prome Ministro Evelyn Wever-Croes firme enfrente integridad

*Mitar BBO a pone Pueblo lubida scandal cu a habri Siglo 21

*Prome 25 aña Siglo 21 a exigi Ley di Integridad contra scandal 

ORANJESTAD(AAN)—Na 2017 mr. Evelyn Wever-Croes a acepta e funcion di Prome Ministro di Aruba, despues cu e ganador di eleccion Mike Eman a wordo castiga pa Pueblo di Aruba cu un derota y un perdida enorme di voto, cu a haci cu el a nenga di bolbe bira Prome Ministro.

Pa Mike Eman por a bira Prome Ministro na 2009 e tabata tin mester di un arma poderoso cu tabata deshaci di mitar BBO.

Ta e hecho cu Mike Eman a priminti cu e ta baha BBO cu mitar, a haci posibel pa  Pueblo lubida e caso penal contra cuatro politico prominente y den funcion Ministerial di AVP, incluso e lider di AVP di e tempo mes, cu tabata Henny Eman.

Fondo Desaroyo Nobo San Nicolas tabata e scandal grandi cu a pone cuatro Ministro di AVP dilanti Huez.

E caso a caba cu un acuerdo entre Ministerio Publico, cu na principio kier a apela e sentencia di “vrijspraak”di Henny Eman, pafor di sala di Corte di Husticia.

Unabez e caso a termina, Mike Eman a presenta e promesa di Mitar BBO y asina den tempo record Mike a gana eleccion cu  e promesa Mitar BBO, cu  manda e Caso Fondo desaroyo Nobo San Nicolas, pa olvido.  Mike Eman por a gana eleccion cu Mitar BBO.

Manera ya bisa, semper ta keda pregunta con e caso Fondo Desaroyo Nobo San Nicolas, den cual lider di e tempo di AVP tabata uno di e acusadonan, a termina.

Hecho ta keda cu den silencio total, “Mitar BBO”a wordo priminti na Pueblo dor di Mike Eman, y Fondo Desaroyo Nobo San Nicolas, a wordo lubida.

Interesante ta cu uno di e Proyectonan di Gobierno Mike Eman tabata, e proyecto “Bo Aruba”cu reparticion di 1.6. Biyon di Aruba, den cual Algemene Rekenkamer Aruba atrobe a papia di fayo contra e Ley di Contabilidad.

Ora papia di Siglo 21 ta papia di entrada di un Siglo cu a mira Ministronan di AVP, condena na castigo di prison.

Ora papia di e prome 25 aña di Siglo 21, ta papia di suficiente scandal pa Aruba a conoce un tipo di criminalidad nobo, cu tabata corupcion cu servicionan y propiedad di comunidad.

Ministronan den prison ya no ta nada na Aruba, cu segun sentencianan di Huez a conoce negoshi cu loke ta di Pueblo.

Esaki tabata parti tambe di e herencia di Gobierno Evelyn Wever-Croes, cu mester a recupera Aruba riba tereno financiero pero na mes momento mester a cera porta pa e brote di corupcion cu gobiernonan di AVP a laga atras na entrada di Siglo 21.

Un grito pa Integridad tabata base di esfuersonan grandi di Prome Ministro Evelyn Wever-Croes, cu ayera a duna prueba cu e ta respeta autoridad y sistema legal di Aruba.

E Ley di Integridad di Aruba, na cual e politico nobo Evelyn Wever-Croes a tene duro, tabata basa riba e experencianan doloroso di Aruba cu personanan cu a base di e sistema democratico pa gobernacion di e pais, a abusa di confiansa di Pueblo.

E Ley aki ta cera porta pa un persona cu autoridad penal di e pais ta sospecha como persona, por ta Ministro.

Prome Ministro Evelyn Wever-Croes tabata uno di e politiconan cu mas a lucha pa introduccion di un sistema cu ta garantisa integridad di gobernantenan di Aruba.

Su reaccion riba detencion di Glenbert Croes ayera, ta papia di un actitud, cu ta respeta Ley cu ta base di e cuadro democratico di un pais.

E reaccion di Prome Ministro Evelyn Wever-Croes ta ehemplar den su funcion como Prome Ministro di e pais y ta un contraste den loke Aruba a mira den caso penal manera di Avestruz y e forma cu Mike Eman a exigi pa Benny Sevinger ya condena pa Huez, sigui gana placa di Aruba como Miembro di Parlamento.

Sin duda un prueba di candela a wordo entrega na Prome Ministro mr. Evelyn Wever-Croes, cu obviamente tabata bou impresion humano di e sucedido y den e caso aki mester reemplaza un persona di su propio familia cu a bira acusado.

Prome Ministro Evelyn Wever-Croes a keda fiel na su responsabilidad como dirigente di un Pueblo, cu ta wordo goberna a base di Ley.

Den porta di eleccion, Prome Ministro Evelyn Wever-Croes cu ta alabez lider di MEP, mester reemplaza un Ministro.

Prome Ministro Evelyn Wever-Croes a keda fiel na su tarea como Ministro Presidente, pa permiti e caso di Glenbert Croes sigui su transcurso, na un momento dificil pa su persona, cu ta keda un ehempel di gobernante pa su pais!