Detencion di 21 persona na Colombia pa supuesto abuso di pashent den fundacion pa rehabilitacion

Abuso di Arubianonan a wordo denuncia algun luna pasa

*Gobierno di Aruba a kibra contract cu fundacion colombiano 

ORANJESTAD (AAN): Recientemente, den luna di September, DIARIO a publica un articulo extenso cu a menciona e hecho cu Gobierno di Aruba a kibra contract cu un fundacion na Colombia pa motibo cu pashentnan tabata wordo maltrata y abusa.

            E situacion cu a keda treci dilanti tabata un asunto grave relaciona cu Fundacion Corporacion Con Animo na Colombia, na unda Aruba tabata manda adictonan pa haya tratamento.

            E luga aki ta ubica na un finca grandi na Cundinamarca, cerca di Bogotá, y cu a pone cu Gobierno di Aruba a tuma e paso di termina e contract cu nan.

            Den e caso aki autoridadnan na Aruba a ricibi pruebanan comprometedor di abusonan fisico, mental y te hasta sexual. Varios ex-pashent di e fundacion cu a regresa Aruba a declara na forma amplio, di e abuso y humiliacion cu nan a mira y mester a soporta durante nan estadia na e fundacion aki.

            Ta asina cu Aruba tabatin un contract cera di mas o menos 9 aña pasa cu e Fundacion Corporacion con Animo na Colombia, caminda tabata manda localnan pa rehabilita.

            Mas o menos 3 pa 4 aña pasa, un of mas pashent a bin bek Aruba y a bati alarma; nan a conta di e maltratonan, y poco a poco a start un investigacion.

            Recientemente a bin comproba cu tur loke e pashentnan tabata conta ta berdad. Declaracionnan mas recien di e pashentnan cu a bin bek tur a declara mesun cos y a conta di e mesun maltratonan fisico, mental y di violacion sexual.

            E lugar ta un finca grandi, hopi bunita den naturalesa, pero segun e pashentnan cu a bin bek, en realidad e ta un centro di tortura.

            Ora cu Gobierno di Aruba a dicidi di para e contract, a exigi pa tur e personanan di Aruba cu tabata den e centro di rehabilitacion bin bek. Mientrastanto, e doño di e fundacion a entama un caso sumario contra Gobierno pa motibo cu a kibra e contract y e Fundacion tabata kier pa e ultimo grupo di persona aki keda den e centro na Colombia te ora Hues dicta un sentencia.

            Ora a trata e caso den Corte, despues cu Hues a tende ambos partido, a tuma un pausa pa mira e gravedad di e situacion. Hues mesora a rechasa e peticion di e fundacion y a exigi pa Gobierno di Aruba pa manda busca e pashentnan cu a keda mas lihe cu tabata posibel.

            Den un desaroyo nobo, e medio digital 'El Tiempo' di Colombia a reporta cu Fiscal General di e pais a detene y entama un caso contra 21 persona cu ta relaciona cu presunto actonan di violencia, abuso, y incluso provoca morto di pashentnan di un fundacion priva cu ta dedica na rehabilitacion di personanan vulnerabel y cu problema di adiccion na Santander.

            Segun e entidad cu ta investiga y acusa, e personanan involucra ta parti di un structura delictivo cu a ofrece servicio di atencion na ciudadanonan cu problema di adiccion di droga. E personanan aki a incuri den conducta contra di e dignidad y bida di e interno, cu a laga ocho morto y mas di 500 victima.

            E centro di rehabilitacion ta localisa na Bucaramanga, Piedecuesta y Girón.

            Den e investigacion a establece cu nan ta ricibi persona cu ta procedente di diferente municipio di Santander, parti noord di Santander y Atlantico. E pashentnan lo ta victima di condicionnan di enciero, falta di salubridad, suministro di cuminda, entrega indiscrimina di tratamento psikiatrico y periodonan largo di incomunicacion.

            Ainda no tin claridad si den e caso aki ta trata di e mesun fundacion cu gobierno di Aruba a kibra contract cu ne. Mientrastanto, DIARIO lo keda sigui e desaroyo aki di cerca.

*Riba potret, un imagen di e publicacion di El Tiempo y otro di e fundacion caminda Aruba tabata manda algun persona pa haya tratamento.