Den sesionnan entre stakeholders y companianan di UTV y ATV lo pone nan na haltura di maneho nobo

​

Minister Ursell Arends:

ORANJESTAD (AAN) – Minister Ursell Arends, den su calidad di Titular di Transporte y Naturaleza, den entrevista cu DIARIO a menciona cu e ta organizando sesionnan entre e stakeholders y e companianan di UTV Y ATV,  p’asina pone nan na haltura kico ta bay ta e maneho nobo y unda ta bay cu e rutanan cu nan por opera.

            Di e forma aki nan por prepara pa haci e cambionan necesario. E dignatario a subraya cu e ta compronde e reclamonan di e ambientalistanan, pasobra nan ta wak cu durante e ultimo dianan nan ta core riba beach, otronan ta core riba areanan cu cierto parhanan ta uza como habitat den e temporada caminda nan ta bay reproduci, tur esaki ta cosnan cu mester tene cuenta cu nan.

            El a splica cu nan ta preparando tambe pa bay educa tur e companianan aki, no solamente riba e parti di proteccion di mangrove pero pa agrega mas parti di naturaleza den e programa aki, p’asina aki nan por ta mas conciente con mester atende cu nos naturaleza.

            “Tur esaki ta cambionan cu ta bini p’asina aki hunto nos por realiza e importancia di naturaleza, reconoce esaki y dune su oportunidad pa regenera su mes. Esey ta algo cu mi ta kere cu tur e companianan ta compronde. Nos pilar economico ta turismo, pero si nos wak bon, na final di dia nos naturaleza ta hunga un rol hopi grandi pa turismo, y nos propio hendenan ta exitoso” Arends a bisa.

El a agrega cu si nos por cambia nos habitonan y respeta naturaleza, nos lo ta den un bon forma como pais.

            E mandatario a señala cu tin di e companianan di tour cu a tuma e liderazgo di a implementa gps den nan aparatonan, cu cierto areanan cu nan no mag opera. “Mi ta kere cu den combersacion cu tur e companianan di tour cu ta ofreciendo e producto aki, nos lo yega na palabracionnan concreto cual ta e areanan unda nan mester opera, y e periodo pa nan por haci e cambio di e forma aki nos tur lo por disfruta di un miho Aruba”, Minister Ursell Arends a señala.

            E mandatario a declara tambe du den e Landsverordening Personenvervoer tin cierto sancionnan cu ta mara cu e director di DTP por duna nan cierto vergunninghouders  y aworaki mirando cu falta reglamento nan ta trahando riba cierto reglamentonan pa asina sancion por wordo duna na tur tipo di compania y operador cu tin un vergunning, y si nan no atende nan mes na loke ta wordo prescribi nan lo bin sancion pa nan tambe.

            “Ora cu nos a instala e taskforce mester ta algo interministerial mirando cu ta toca e ministerio di naturaleza y transporte pero tambe e ministerio di husticia y ministerio di finanzas, ya cu departamento di finanza ta resorta bao su ministerio. Tambe e ta toca departamento di keuring, cu ta bao ministerio di asuntonan general. Pesey e taskforce ta interministerial, pa tin colaboracion riba nivel di tur e ministernan, p’asina nos por yega na e miho aan pack pa e problematicanan aki”, Minister Ursell Arends a remarca.