Den pueblo tin preocupacion cu no a forma gobierno ainda y ta strobando progreso di Aruba

*Miho Gobernador instala un Zaken Kabinet

ORANJESTAD (AAN) – Por scucha diferente ciudadano manifesta na preocupacion, pa motibo cu te ainda AVP y FUTURO no a forma gobierno. Hopi hende no solamente ta preocupa, pero tambe disgusta y no ta di acuerdo, no ta gusta, e actitud cu e lider di FUTURO ta asumiendo, y hasta e ta wordo califica eyfo como arogante y tambe cu Mike Eman no ta mustra e forza, cu tur e experiencia politico cu e tin, pa pone pia riba tera y bisa “te aki! Esey no por!

            Opinionnan eyfo ta cu e dos partidonan aki no tin compromiso cu e pueblo y cu nan ta mermando e progreso di Aruba di e manera aki. Y ta core den pueblo e comentario cu pa ley, si nan no ta forma gobierno aki poco un siman of kizas un tiki mas, Gobernador por instala un Zaken Kabinet, cu no ta pa locual pueblo di Aruba a bay vota, pero si ta pa bon di Aruba miho Gobernador tuma e decision ey mas pronto posibel.