Den e dianan aki corda cana cu bo remedinan den bo tas

POH Jasmira Mora Garces:

ORANJESTAD (AAN): Jasmira Mora Garces, Coordinador di POH na Wit Gele Kruis a duna di conoce cu e tema di remedi semper ta keda hopi importante, principalmente den temporadanan festivo.

            El a bisa cu nan ta duna algun tips y un di nan ta cana cu bo remedi den no tas den e dianan aki. Unabes cu ta dianan di fiesta, reunion ta cuminsa na un cas y despues por bay bishita un otro cas, 12'or ta bati y bo no tin bo pildernan cu bo.

            Ora cu ta papia di insulina, mester enfatisa cu esaki mester keda friu. Hopi pashent no ta ripara of ta lubida cu riba e paki di insulina tin un sticker color neon cu ta indica cu e remedi mester keda den un lugar fresco, den un temperatura un tiki abao. E remedi no por keda den auto ya cu calor ta bay haci cu e insulina no ta efectivo mas, Jasmira Mora Garces a remarca.

            Un tip cu nan ta duna ta cumpra un etui y pone e 'cool elementnan' den dje y hinca eyden e pen di insulina y cana cu ne den bo tas. Hende homber por cana cu un etui tambe.

            Un otro tip cu kier duna pa loke ta insulina ta e parti di comemento. Tin hopi cos dushi, hopi cos salo, hopi alcohol cu ta envolvi den e dianan aki. P'esey ta bon pa calcula e porcionnan, haci e porcionnan mas chikito, por ehempel, el a indica.

            Hopi importante ta keda e parti di awa. Esaki ta esencial, a enfatisa.

            Si den e dianan aki bo tin un afspraak cu bo POH, saca bo tempo pa bay. Si no por bay, toch cancela pasobra bo ta strobando un otro pashent cu si kier haci uzo di e oportunidad di bay cerca su POH y haci su controlnan.