Den April tin di traha hunto pa proteha nos muchanan contra tur tipo di abuso

En conexion cu luna nacional contra abuso di mucha

ORANJESTAD (AAN): Gobierno di Aruba a decreta luna di April como luna nacional contra abuso di mucha.

   E ta ancra den un decreto pa asina permanentemente tur aña den luna di April dedica y aumenta conscientisacion contra abuso di nos muchanan. Den e cuadro aki, Gobierno di Aruba ta extende un invitacion na tur instituto, specialmente departamentonan di Gobierno pa durante e luna di April, dedica na e tema importante aki.

   Prome Minister demisionario Evelyn Wever-Croes a expresa cu ta hopi importante pa durante e luna aki papia y comparti informacion di e tema aki lo mas posibel, pa asina aumenta conscientisacion cu abuso contra nos muchanan no ta aceptabel.

   Durante gobernacion di Gabinete Wever-Croes I y II, a tuma varios decision riba proteccion di nos muchanan. Desde Juli 2020 a aumenta e castigo di delito sexual contra nos muchanan, a bin cu un codigo di proteccion pa asina tur profesional por traha na un forma uniforme y pa tur informacion di e mucha ta central un caminda. Tambe Gobierno a traha riba empoderamento di varios departamento manera Bureau Sostenemi, Family Justice Center y otronan, pa asina profesionalnan ta bon ekipa pa por proteha nos muchanan.

   Lamentablemente datonan ta indica cu ora ta trata di abuso sexual di mucha, mas di 99% di e casonan ta un persona cerca di e mucha. P’esey ta importante pa mas y mas papia cu e muchanan, scucha nan y pone atencion.

   “E muchanan ta wak den nos adultonan cu tey pa protehe, defende y duna nan amor y cariño. Ban hunto den luna di April reconfirma nos compromiso di traha hunto pa proteha nos muchanan contra tur tipo di abuso” Prome Minister a expresa.