Democracia cuestiona cu Benny den Parlamento!

​

Benny Sevinger como Miembro di Parlamento ta dicidi kico ta Ley

Awe e caso pa kita casi 1 Miyon Florin di Benny ta haya su inicio
Caso di cacho a entrega prueba cu democracia ta exigi pa sigui ley 

ORANJESTAD (AAN) Ainda por papia di un Estado di Derecho? Esaki ta e pregunta cu a wordo presenta na DIARIO pa expertonan legal, cu ta trece dilanti cu na e momentonan aki den Parlamento di Aruba, un caso historico ta presenta.

Kico ta realmente un Estado di Derecho, manera informantenan a trece dilanti ayera a keda presenta ora mester a actua den casonan cu cacho ta envolvi.

Ora autoridad mester actua na forma severo, a bini claramente dilanti cu Ley mester ta Ley na un pais y no por haci excepcion ni ora ta atende cu asuntonan cu ta regarda cacho of cualkier otro materia.

E hecho cu Benny Sevinger tin un strafkaart awor no ta permiti pa e participa na leynan electoral, loke ta cera porta pa e por drenta den Parlamento. Awor con e por keda den Parlamento hasta ora Huez a condene pa no keda Legislador di e pais?

Huez a ordena cu Benny Sevinger no por ocupa e funcion di Miembro di Parlamemento como castigo pa su culpabilidad den Caso Avestruz.

Benny Sevinger, cu sosten di actual lider di AVP Mike Eman, a dicidi cu e ta keda den Parlamento loke hasta a causa kiebra di partido AVP.

Corte di Husticia a atende e caso den apelacion y a aumento e castigo di Benny Sevinger, cu ainda ta Miembro di Parlamento cu sosten di loke a resta di fraccion di AVP den Parlamento.

Awe den Corte di Husticia ta cuminsa atende cu e caso den cual mester dicidi si Benny Sevinger mester pone Un Miyon riba mesa. Awe mester dicidi con e caso lo mester desaroya, pues ta tene e asina yama “regiezitting”cu a wordo pospone en espera di e decision di Corte di Husticia, cu mientrastanto a aumenta e castigo cu Huez den Prome Instancia a impone.

E caso aki ta haya atencion total den mundo di husticia debi na e forma cu Benny Sevinger ta pone decision di Corte di Husticia un banda y ta mantene su asiento Parlamento di Aruba, cu ta e instancia cu a dicidi kico Huez por haci cu un caso manera di Benny Sevinger.

Expertonan a mustra, cu te awor, uno di e puntonan mas importante den e caso actual di Benny Sevinger no a bini dilanti cu ta e hecho, cu Hueznan mester tene nan mes na Ley y den ehecucion di nan tarea mester tene nan mes na loke Ley ta trece dilanti.

“Un Huez no por dicidi pa su mes kico tya ley, pues regla basico di un pais. Un Ley ta cuminsa cerca Gobierno of Parlamento den ehecucion di nan trabou. E Ley mester pasa Parlamento pa e por bira Ley,”informantenan ta enfatisa.

Parlamento di cual Benny Sevinger ta forma parti awor, ta introduci un Ley cu ta dicidi cu un accion di un persona por ta un crimen.

Pues e acusacion cu a wordo lanza contra Benny Sevinger, ta basa riba Leynan cu Parlamento a introduci pa asina bay contra loke ta malo y sostene loke ta bon, loke ta base di democracia.

Ta den Parlamento a introduci Leynan cu ta dicidi cual ta e caminda corecto pa atende cu porpiedad di Pueblo y cual no ta e caminda corecto y cu ta Ley, cu Parlamento a acorda, a duna Huez y den apelacion Corte di Husticia e poder pa dicidi si Benny Sevinger ta culpabel of inocente.

Hueznan mester tene nan mes na e cuadro di Ley Penal di Aruba.

E ultimo paso cu Benny Sevinger por tuma ta den e Orden di Ley di Aruba ta bay den Cassatie, caminda lo wordo dicidi si e Huez y despues Corte di Husticia a sigui cu e reglanan legal, pues loke Ley cu Parlamento a introduci como Ley, ta bisa.

Informantenan ta papia di un situacion sumamente serio cu ta afecta e Orden di Ley na Aruba pasobra Benny Sevinger ta nenga di cumpli cu un castigo di Huez y no ta retira di Parlamento, manera su castigo ta encera.

Informantenan ta considera e situacion actual como un momento di crisis pa e sistema legal di Aruba como Estado di Ley mas ainda como cu ta Pueblo ta doño di Parlamento cu mester sigui paga placa pa estadia di Benny Sevinger den Parlamento.

Expertonan ta puntra nan mes con na un compania priva, Benny Sevinger por a keda ta cobra placa den un funcion, cu Huez a bisa cu e no por ocupa.

Awe pues Benny Sevinger lo ta den noticia atrobe den un democracia cu pa presencia paga cu placa di Pueblo den Parlamento di Aruba di Benny Sevinger, despues di e decision di Corte di Husticia ta tambalea.