Demanda halto di cita online ta limita flexibilidad pa atende esnan cu ta drenta sin cita specialmente adulto mayor

Directora Sharin Luydens di Censo

ORANJESTAD (AAN) – Oficina di Censo y Registro Civil Aruba ta un organizacion chikito, pero cu ta maneha un volumen di trabao hopi grandi cu un nivel di eficiencia hopi halto. Directora, señora Sharin Luydens, a duna di conoce cu Censo ta pasando actualmente den un periodo hopi druk, relaciona cu diferente producto, specialmente e producto di inscripcion.

   Na 2014, e fecha di expiracion di paspoort a wordo cambia di 5 pa 10 aña. Como resultado, cada dies aña ta surgi un piek grandi di peticion pa paspoort nobo. Señora Luydens ta haci un apelacion na tur ciudadano pa controla e fecha di vencemento di nan paspoort y pidi un cita na tempo. Na 2024, Censo a entrega mas di 12 mil paspoort.

  Ademas, na november 2020 Censo a tuma e responsabilidad pa emiti rijbewijs for di polis, den un momento cu ya tabatin retraso. Awor e oficina tambe ta confronta cu e piek adicional di peticion pa rijbewijs. Durante 2024, Censo a entrega aproximadamente 14 mil rijbewijs.

  En total, na 2024 Censo a procesa 216.446 producto, sin inclui algun servicio cu no ta wordo conta oficialmente, pasobra nan no ta genera ingreso. Un ehempel di esaki ta entrevista relaciona cu matrimonio di conveniencia, cu ta tuma hopi tiempo di trabao.

Actualmente tin un piek hopi halto di cita online, loke ta haci mas dificil pa atende esnan cu ta drenta sin cita.

    Segun Luydens, Censo tin solamente 24 trahado pa atende tur cliente, apesar di e demanda grandi pa servicio. Si e demanda sigui crece, e tempo di espera naturalmente tambe lo aumenta. E situacion aki ta limita e flexibilidad pa atende hende cu ta cana drenta Censo, specialmente e grupo vulnerabel di nos comunidad, manera nos adultonan mayor.

   Den e contexto aki, señora Luydens ta pidi famia of conocinan pa yuda e grupo aki haci nan cita online, pa asina nan no mester bay Censo personalmente y keda warda hopi den memey di e drukte. Tambe tin un servicio unda Censo por bay na cas di un adulto mayor cu no por mobilisa, despues cu un yiu of familiar a haci e areglo y pago necesario na oficina.

“Pa hopi aña caba Censo ta comprometi na duna un servicio di calidad. Esaki ta realmente den nos curason. Sinembargo, na e momento aki nos capacidad simplemente no ta iguala e demanda halto cu tin,” señora Luydens a expresa.