Decreto Ministerial a wordo coregi y lo por traspasa permiso pa miembronan di famia di e taxista cu bira malo of fayece

​

Parlamentario Hendrik Tevreden:

ORANJESTAD (AAN):   Parlamentario y lider di Fraccion di MEP, Hendrik Tevreden a duna di conoce relaciona cu e asunto di permiso pa taxi, cu  nan fraccion a haci esfuerso pa sinta cu e taxistanan y tambe cu Minister Arends.

            Tevreden a indica cu aworaki, despues di e  decreto ministerial (MB) ultimo, ambos partido ta riba un caminda nobo y cu mihor oportunidad pa yega na otro.

            Ora cu e welga a cuminsa di parti di e taxistanan, Fraccion di MEP, a invita e taxistanan pa sinta na mesa den Parlamento pa asina por a haya sa kico ta nan preocupacion y a puntra nan pa nan keda habri y pa busca dialogo.

            Tambe a pidi e presidente di e comision Sr. Kamperveen pa yama alabes e reunion cu minister. Kiermen dos reunion a tuma lugar, uno cu e taxistanan y otro cu e minister, den Parlamento. E intencion di esakinan tabata pa por a trece trankilidad  y claridad den e mal comprondemento entre e dos partidonan, pero principalmente pa den e area economico-turistico, pa esaki no wordo afecta, a bisa.

            Asina a bin compronde for di e taxistanan cu e decreto ministerial #2 cu ta papia riba; para e traspaso di permisonan na otro personanan den famia den caso cu bira malo o fayece, cu esaki tabata un di e puntonan cu tabata haci dolor cerca e taxistanan.

            Relaciona cu esaki e minister a splica cu tin casonan andando di personanan cu ta bende permiso di taxi, di cual fraccion di MEP a bisa cu esey no ta aceptabel pasobra esey no ta para den ley y ta un practica ilegal, Hendrik Tevreden a remarca.

            Taxistanan a splica di nan banda hopi detaye den e reunion di parlamento y nan a boga pa, entre otro mas tempo pa loke ta riba mesa, pero tambe kier sa dicon no ta honra articulo 15 di e ley unda cu den caso cu un hende ta fayece, esun cu ta gana e salario, esta un famia den cas di e chauffeur di taxi por continua trece entrada den cas. Esey ta nifica cu si un taxista fayece of bira malo cu no por core taxi mas, e ora un miembro di su famia por tuma e permiso pa continua cu e trabao.

            Parlamento a haci preguntanan na minister y minister na su turno a sali cu MB number 3. Parlamentario Tevreden a bisa cu MB number 3, den mayoria di aspecto ta bay bek na e ley y maneho manera tabata na 2022. Por bisa cu MB number 2 unda cu no ta permiti traspaso, MB number 3 si ta bisa cu lo por permiti traspaso na un miembro di e famia manera cu ta indica den articulo 15 di e ley pero lo inclui un comision pa vigila si tur cos ta cuadra pa por duna e traspaso.

            A menciona hopi caso di fraude y cambionan ficticio cu ta o a tuma lugar cu permisonan di taxi. Tur esaki Minister Arends lo tin cu indica e pruebanan na Parlamento y lo ta bon pa entrega keho tambe na ministerio publico riba esakinan.

            Pero e esencia principal ta cu e MB number 2 a wordo coregi y esaki ta trece cu ne cu den caso cu fayece o malesa e taxista lo por pidi pa pasa permiso na un familiar den su cas pa por continua pone pan riba mesa. Algo mas cu husto, na nos opinion, lider di Fraccion di MEP a declara.