Debate Nacional ta confirma participacion di tur lider politico

E ta tuma luga awe diamars:

ORANJESTAD (AAN): E ekipo tras di e exitoso “E Debate 2021” y “Debate pa Millennials 2017” ta bek cu un otro evento — E Debate Nacional. Esaki ta programa pa tuma lugar na Renaissance Convention Center awe Diamars, 19 di november, 2024 pa 7or di anochi.

            E debate aki ta wordo organisa door di un grupo dinamico di millennials y profesionalnan hoben dedica na provee votadonan cu informacion valioso pa e eleccion venidero – 6 di december.

            Esaki lo ta un anochi unda cu Lidernan di partido hunto cu un colega di partido lo ricibi preguntanan riba diferente topico cu ta di suma importancia pa nos comunidad, a base di un encuesta cu a wordo haci durante e luna di october. For di e resultadonan, a scoge e preguntanan pa e anochi aki.

            E Debate Nacional ta aspira pa trece un perspectiva fresco na discurso politico door di brinda un plataforma pa tur partido expresa nan plan, vision, y promesanan. Door di e foro inclusivo aki, e organizadornan ta compromete na asegura cu votadonan tin e conocemento cu nan mester, pa vota cu confiansa.

Aspectonan di e Anochi:

Maestro di Ceremonia: Erin Croes, persona renombra di Magic FM.

Moderadornan: Jacky Wernet y AJ Lee Jr, e duo di Revista Xclusivo.

Participacion di tur lider di partido y un colega acompañante.

ACCION21: Miguel Mansur y Zoraida Conijn-Berkel

AVP: Mike Eman y Wendrick Cicilia

CURPA: Eric Ras y Max Robert

FUTURO: Gerlien Croes y Geoffrey Wever

HTC: Gilbert Webb y Victor Rosario

LPR: Rycond Santos y Francis Malca

MAS: Marisol Tromp y Aquannette Gunn

MEP: Evelyn Wever - Croes y Rocco Tjon

PPA: Otmar Oduber y Eduard Pieters

RAIZ: Ursell Arends y Misha Raymond

RED: Ricardo Croes y Rudy Lampe

            E programa di anochi lo ofrece un variedad di formatonan di pregunta diseña pa obtene contestanan detaya y plan, haciendo uzo maximo di e tempo limita disponibel.

            E debate lo tuma luga awe diamars, 19 di november 2024, na Renaissance Convention Center for di 7:00 pm pa 10:00 pm. Porta ta habri 6:00 pm y e evento lo cuminsa 7:00pm en punto.