Debate electoral lo duna Pueblo e oportunidad pa scucha e plannan di e lidernan politico

Director di KvK, Martijn Balkestein ta informa

ORANJESTAD (AAN): Martijn Balkestein -director di Camara di Comercio a yama un conferencia di prensa pa anuncia cu nan ta organisa un biaha mas, hunto cu Universidad di Aruba, un debate politico, cu ta priminti di ta hopi dinamico.

            Segun Balkestein, e debate ta un oportunidad pa un di tur na Aruba, scucha e pensamento y ideanan di e lidernan politico, kico ta nan plannan pa Aruba, con nan lo resolve cierto problemanan actual. El a indica cu en general, ta un biaha den cada cuatro aña, poblacion ta haya e oportunidad di influencia e rumbo, via votamento, den cual rumbo nos kier bay. Y ta sumamente importante pa tur hende na Aruba vota concientemente.

            E debate tin como meta pa yuda Pueblo forma nan opinion basa riba loke ta wordo discuti y asina elegi e partido mas adecua pa dirigi e pais.

            Balkestein a splica cu nan a desaroya un formato hopi dinamico, rapido y interactivo, cu lo consisti di tres tanda: tur partido ta haya un chens pa presenta nan puntonan dilanti  y discuti cu e otro lidernan riba e puntonan. Nan lo duna den un di e tandanan e chens pa e partidonan presenta un otro candidato riba nan lista, pa asina nan por presenta nan mes, nan plannan y vision.

            E programa ta cla caba, pero KvK lo divulga e detayenan na ultimo momento pa asina por tin un 'sorpresa' pa e participantenan.

            Den e debate aki, e candidatonan lo tin un rol hopi mas interactivo y nan lo garantisa cu vos di Pueblo lo wordo scucha, pa percura cu temanan cu ta wordo discuti den pueblo, lo wordo treci dilanti.

Nan tambe a traha un email special pa e debate, This email address is being protected from spambots. You need JavaScript enabled to view it., cu ta bay ta disponibel den nan website, pa asina esnan interesa por manda nan pregunta, cu ta bay via un comision cu Universidad di Aruba ta bay revisa e preguntanan y lo selecta esnan mas interesante. 

            Nan lo haci uso di app special cu a wordo desaroyo door di Setar pa percura cu pueblo por indica con nan ta haya e presentacion di e candidatonan pa cada tanda. Nan lo midi esaki mesora y lo divulga esaki durante e debate.

            Balkestein a expresa cu e debate ta sumamente importante pa asina garantisa nos democracia y yuda informa comunidad pa tuma un decision conciente na momento cu nan vota.