Deadline pa registra pa un cuenta di Arubalening ta diamars 24 maart

Sharine Croes-Dubero Departamento di Enseñansa

ORANJESTAD (AAN): Departamento di Enseñansa (DEA )  durante luna di maart ta trahando riba peticionnan digital pa Arubalening. Sharine Croes-Dubero di Dea a duna informacionnan con pa haci esaki. Studiantenan mester registra prome den e portal di Arubalening na www.ea.aw  pa un cuenta di Arubalening. Dia 24 di maart lo ta e ultimo dia pa registra. 

Despues cu e registracion keda aproba, mester load tres documento, esta persoonsnummer, papel di 5 florin y papel di 10 florin di Censo. Na momento cu e tres documentonan ta aproba, por haci peticion digital pa sigui studia sea na Aruba mes of na cualkier pais na mundo. Deadline pa haci esaki ta dia 31 di maart. 

Señora Croes-Dubero a remarca cu pa e aña aki, te cu awo tin 150 peticion pa internacional y 18 peticion pa Aruba. Aña pasa tabatin 603 peticion en total di cual 342 a keda otorga. 

E ta encurasha tur studiante cu ta den examen klas, hasta si nan no ta sigur cu lo slaag of no, pero tin pensa di sigui studia sea na Aruba of afo, pa cuminsa cu e proceso di peticion mas lihe posibel prome cu e fechanan di vencemento mirando cu no tin mucho dia mas. El a subraya cu e deadlinenan ta mara na ley por lo tanto no por desvia for di esakinan facilmente pero lo mantene na e reglanan aki.  

Señora Croes-Dubero a informa cu studiantenan cu ta sigui studia na Aruba mes cu ta bin na remarke pa Arubalening ta esnan cu ta sigui IPA, Universidad di Aruba, EPI (Studiantenan cu ta sali di Mavo y Havo) y Xavier University (bachelor den enfermeria).