Darren van Ommeren ta baha como Presidente di SMAC

*Pa Carnaval 73 por spera cierto retonan

ORANJESTAD (AAN)-- Darren van Ommeren, Presidente di SMAC, den entrevista cu Matutino DIARIO, a señala cu aunke tin hende ta bisa cu “semper carnaval tabata asina”, e ta kere cu e desaroyo di nos hendenan mes, e boluntarionan y e disponibilidad di cada hende pa dedica tempo na e organizacion ta bira menos, ta haci cu mester cu organiza algun actividad for di November, pa crea espacio pa tur cos cana trankil den e luna di Januari, cu ta unico luna cu e carnaval ta.

Van Ommeren a mira cu incertidumbre e otro aña cu Carnaval 73, y cu e Carnaval grandi mes lo ta Diadomingo 7 di Februari 2027, pues hopi trempan.

“Pa cuminza cu Fakkel dia 2 di Januari, aunke cu el a sosode den pasado, aworaki ta bira mas dificil, mirando e trabao cu e companianan di sonido tin cu  haci ta haci un tiki mas dificil pa organiza esaki pa dia 2 di Januari. E ta bay ta un reto pa arma e schedule, pero mi ta kere cu esaki ta un trabao cu nos ta bay haci direct despues di carnaval, pa nos laga esaki atras pa e siguiente presidente, pa e por tin sikiera e trabao aki cla caba, y p’e organiza Carnaval 73”, van Ommeren a declara y a anuncia tambe cu e no ta bay un aña mas como Presidente di SMAC.

“Aworaki, esaki ta mi ultimo carnaval, 31 di Augustus, mas of menos, ta mi deadline pa entrega mi relato anual, y un bes cu mi entrega esaki, ami lo baha como Presidente”, Darren van Ommeren a duna di conoce.