Danki na Gabinete Wever-Croes, awe tin placa pa duna bek na comunidad

Parlamentario Evelyn Wever-Croes:

ORANJESTAD (AAN): Durante tratamento di Presupuesto di nos pais siman pasa, Parlamentario Evelyn Wever-Croes a remarca cu ta danki na e vision, determinacion y e bon maneho financiero di su gobierno, Gabinete Wever-Croes, cu awe e gobierno actual, AVP – Futuro, tin e oportunidad pa ehecuta su vision.

  Segun e parlamentario, durante e traspaso di gobernacion na maart ultimo, Prome Minister Mike Eman a gradici’e pa su maneho y pa pone Aruba bek riba e caminda financiero responsabel y sostenibel pa asina awo e gobierno actual por tin e oportunidad y e fondonan pa duna bek na nos pais.

  Parlamentario Wever-Croes a expresa cu lamentablemente, Gabinete Wever-Croes no por a caba di ehecuta su vision cu e fondonan cu su gobierno a crea, esaki debi na diferente factor, entre otro, Gabinete Wever-Croes a hereda un situacion financiero teribel y despues e pandemia cu a causa nos pais hopi daño. Sinembargo, danki na tur esfuerso, di su gobierno, profesionalnan y di cada ciudadano di nos pais, a logra pone nos pais bek riba pia y genera entrada. “Awo nos por bisa, esaki ta e momento di duna bek na esnan cu mas mester”, el a enfatisa.

  E parlamentario a gradici y elogia e minister di finansa actual, señor Geoffrey Wever pa continua cu e maneho y e vision di Gabinete Wever-Croes. “Presupuesto 2026 ta motibo di hubilo. Danki na maneho di Gabinete Wever-Croes, awe tin placa pa duna bek na esnan cu mas tin mester”, Parlamentario Evelyn Wever-Croes a expresa.