Cuatro vuelo cancela riba Dialuna a crea dolor di cabez pa acomoda e pasaheronan

Tormenta di sneeuw na Merca y pa colmo problema tecnico

• A bay busca camber pa promedio di 774 pasahero
• Pa colmo tin scarcedad di camber den weekend 

ORANJESTAD (AAN): Dos tipo di circunstancia a presenta su mes riba Diadomingo na Aruba, y esaki a culmina den un dolor di cabez pa autoridadnan na Aeropuerto di Aruba, y hopi dificultad inespera pa personal di Groundhandling di tres diferente Aerolinea cu no por a lanta vuelo mas debi na forza mayor.

   Tres Aerolinea no por a lanta vuelo mas, debi na situacion pisa di maltempo cu sneeuw na Merca.  E siman aki tin algo cu ta ser yama ‘Siberian Polar Vortex’ cu ta congelando gran parti di Canada y Merca, ocasionando hopi mal tempo na algun Aeropuerto.

   Es mas, e ‘Siberian Polar Vortex’ aki lo hasta yega partinan di Florida mañan (Diaranson) y tin pronostico cu un biaha mas sneeuw lo cay na Florida.

   E situacion di maltempo na Aeropuerto di Toronto (Canada) tabata asina extremo, cu finalmente e avion di Air Canada Rouge, esta un Airbus A321 cu vuelo 1991 di Aruba pa Toronto a wordo cancela.  E avion aki por carga maximo 196 pasahero.  Pues por mira aki cu casi 200 pasahero a keda sin por sali, y mester a keda Aruba.

   Vuelo di jetBlue 1058 cu ta sali di Aruba pa JFK Airport na New York cu un Airbus A320 a wordo cancela tambe.  E avion aki por carga maximo 162 pasahero.

   Un otro vuelo di e compania, esta jetBlue 874 cu ta sali di Aruba pa Boston Logan Airport cu un Airbus A320 a wordo cancela.  E avion aki tambe ta carga maximo 162 pasahero.   Pues den un frega di wowo, jetBlue a laga como 300 pasahero stagna.

   Ora cu a kere cu lo no tin mas cancelacion di vuelo, ata mas atardi e avion widebody di Boeing 777-200 di British Airways a yega pa 5:26 pm.  Sinembargo e vuelo di regreso pa bula di Aruba pa isla di Antigua pa despues sigui pa Londres a wordo cancela.  Esey debi cu a constata cu tin un dificultad tecnico cu e Boeing 777 aki.

   E vuelo di regreso pa 6:58 pm di vuelo British Airways 2156 a wordo cancela, y e solo avion aki tin capacidad pa 224 pasahero.

   Problema logistico: Pues segun calculo, un promedio di 774 pasahero (sin inclui personal di cabina) a keda atras Diadomingo y a confronta e realidad cu casi tur Hotel na Aruba ta yen-yen.  E cambernan cu e pasaheronan aki a tabata ocupa prome, ya a bay pa pasaheronan nobo cu a yega Aruba riba Diadomingo.

   Groundhandlers di tanto Air Canada Rouge, jetBlue, y British Airways a haya nan ta splica e pasaheronan cu e vuelonan lo no sigui, y cu esnan cu ta bay pa Canada y Merca lo bula e siguiente dia (Dialuna), como cu e pronostico di tempo ta mihor pa Toronto, New York, y Boston.

   Esnan di British Airways a indica cu e dificultad tecnico aki di e Boeing 777 no por wordo drecha na Aruba, pues tin di bay warda un tecnico bin di exterior pa asina drecha e avion.  Normalmente vuelonan di British Airways ta solamente riba Diadomingo.

   British Airways tin di tuma decision si ta bay drecha e avion, of ta manda busca un otro avion wide-body pa cruza Oceano Atlantico pa busca esnan stagna na Aruba.

   Cuminsa busca camber: Tur esaki a pone cu e pasaheronan aki cu a keda stagna na Aruba, a haya nan obliga di bay busca camber pa hospeda un anochi extra.

   Pa colmo segun regla di internacional di ICAO, como cu e vuelonan pa Canada y Merca cu a wordo cancela debi na asunto di mal tempo, esaki ta gasto cu e aerolinea lo no carga.  Pues ta gasto di camber y transfer cu e pasaheronan mes tin di paga, cu excepcion si nan tin Travel Insurance cu ta cubri retrazonan debi na mal tempo.

   Den caso di British Airways, e fayo cu e Boeing 777 si ta wordo cubri door di e aerolinea.  Pues nan si cu ta bayendo Londres, ta paga pa transfer y camber di Hotel, y ta duna vouchers pa cuminda.  E ora groundhandlers a cuminza bay na telefon pa busca e poco cambernan cu tabatin disponibel.

   Sinembargo dado momento a yega cu ningun Hotel tabatin camber mas.  E ora a cuminza busca camber disponibel cerca algun Airbnb y tambe VRBO cu ta huur casnan cu turistanan.  Di e forma ey na final aparentemente a logra haya camber pa tur hende.

   Tres vuelo a sali Dialuna: Tur pasahero a wordo avisa cu nan tin di regresa Dialuna mainta of merdia pa nan vuelo di regreso.

   Esnan cu a yega prome Dialuna mainta tabata e pasaheronan cu ta bay abordo di e vuelo di Air Canada Rouge rumbo pa Toronto.  E vuelo aki finalmente a lanta vuelo pa 10:44 am.

   Despues a sigui e vuelo di jetBlue rumbo pa JFK Airport na New York.  E vuelo aki finalmente a lanta vuelo pa 1:39 pm.

   Un poco despues di dje, e vuelo di jetBlue rumbo pa Boston na Airport tambe a cuminza move.  E vuelo aki a lanta vuelo pa 1:58 pm.

   Dialuna merdia keto bay e avion Boeing 777 di British Airways ta riba plataforma y no por a mira ningun tecnico ta trahando riba dje.  Pues e 224 pasaheronan aki lo ta keto bay den Hotel of Airbnb of den VRBO (Vacation Rentals) wardando informacion tocante nan vuelo di regreso.

    Un palabra di danki inmenso na tur e empleadonan cu riba Diadomingo y tambe Dialuna a dedica extra atencion pa por a yuda acomoda e promedio di 774 pasahero haya un cama pa nan a drumi, y cu nan por a yega Aeropuerto bek na tempo pa sali riba Dialuna.  Bon trabao sigur!