Crimen pisa a baha compara cu 2023 mientras cantidad di accidente di trafico a subi na Aruba

Cuerpo di Polis ta conclui cu:

*E aña aki tabata tin solamente 1 asesinato

*Tabatin 13 victima fatal den accidente di trafico 

ORANJESTAD (AAN):  Pa altocomisario di Polis drs. Ramon Arnhem ta importante pa infoca riba bek riba aña 2024. Un aña di diferente pagina di logro y avance pero tambe di momentonan dificil y areanan cu mester mas enfoke riba dje. Pero mas cu tur por mira bek hopi desaroyo positivo pa cada un Polis como tambe inversion cuantioso pa sigui eleva KPA pa e siguiente etapa. 

DESAROYO Y INVERSION:

            Nos cuerpo ta den pleno desaroyo, nos ta traha cu strategianan clave. Nos ta  profesionalisa nos Cuerpo como tambe fortalese nos politievakmanschap. Esaki nos ta haci door di inverti den curso- y materialnan nobo. Pero e mas importante ta, dedica tempo den e persona patras di e polis.

            E polis, e colega ta nos capital di mas grandi.  Nos kier ta un bon doño di trabao na unda e polis por bin trabao cu smaak y na unda e polis ta central. Mescos cu aña pasa nos a haci hopi renobacion den cuerpo policial, nos a hacie e aña aki tambe. Nos a inverti den auto nobo pa tur departamento den KPA , uniform nobo ta yegando, radio nobo pa cada polis, edificio nobonan y y diferente materialnan nobo pa nos Cuerpo. Pero lo mas importante, ta e klas nan nobo di agentenan policial cu ta drentanto. 

CRIMINALIDAD BAHANDO Y ARUBA MAS SIGUR:

            E aña aki nos tabata tin solamente 1 asesinato. Compara cu aña 2023 nos ta mira cu esaki a baha drasticamente.  Nos ta mira loke ta trata e crimennan pisa compara cu e aña anterior cu esaki tambe a baha pero tin casonan cu a subi. KPA lo sigui traha duro pa pone man riba e sospechosonan y resolve e casonan.

            Conclusion pa 2024 ta cu crimen pisa na Aruba a baha compara cu 2023. Den 2023 e crimen pisa tambe a baha compara cu 2022.  Esaki nifica cu Aruba ta keda bira mas sigur pa loke ta crimen. 

MESTER SIGUI REGLANAN DI TRAFICO MAS MIHOR:

            Ta mira cu tabatin 13 victima fatal den accidente di trafico. Ta notabel cu alcohol, velocidad ta un problema grandi den trafico. Tin hopi accidente cu alcohol ta hunga un rol grandi. Nos a mira tambe cu hopi hende ta djis bay for di e sitio despues di un accidente . Dus doorrijder/ hit & run cu a costa bida di hende. Nos a mira tambe hopi chauffeur cu ta maneha cu velocidad halto of no ta duna preferencia. Tambe e fenomeno di celular ora ta manehando. Corda cada victima ta un di mas.

            Conclusion ta cu pa aña 2024 e cifranan di accidente den trafico y e cantidad di victima fatal den trafico a subi compara cu aña 2023.Esaki ta un lastima, pasobra 2023 y 2022 nos a mira un bahada. Trafico ta un prioridad grandi pa Aruba. Nos lo sigui traha duro pa preveni y pa mira cu esaki baha. 

A CARGA DOS EVENTO GRANDI DEN 2024:

            Carnaval un cultura importante pa Aruba. KPA ta haci lo posibel tambe pa baha e parti detencion y enfoca mas riba prevencion. Un palabra di elogio pa nos comunidad cu a sa di gosa pero na un manera responsabel.

            Eleccion 2024 den december a wordo bon coordina y a haya bon colaboracion cu tur e partidonan. Hunto a mentene e ordo publico y no mester a bay over na ningun detencion. Un otro palabra di elogio na nos comunidad cu a sa di respeta y comporta debidamente. 

ARUBA PIONERO DEN SEGURIDAD DEN CARIBE: 

• KPA tin un posicion fuerte riba area di informacion, nos ta mira y tende hopi cos y ta pesey nos por intercepta hopi droga y preveni crimen.
• Despues di un investigacion internacional a resulta cu Aruba ta hopi sigur den Caribe y ta bon posiciona na unda local y turista por sinti nan sigur. 

SEA E MIHO VERSION DI BO MES:

            Crimen no ta paga na Aruba. Keda riba e caminda corecto pa bo mes y pa bo ser keri.

Error ta humano pero siña di bo errornan. Tin otro solucionnan na unda bo por haya yudansa. Si bo sigi den e bida criminal lo yega un momento na unda bo lo wordo busca y deteni y hiba dilanti mesa berde di Ministerio Publico. No lage yega asina leu.

            Mi ta  ta hopi orguyoso pa cu e bon trabao di mi coleganan y sumamente agradeci pa nan esfuerso. Nan ta esnan cu ta haci e diferencia pa bo y pa nos dushi Aruba.

Mi ta desea boso tur un feliz dianan di fiesta y un bon cambio di aña, asina Altocomisario a finalisa.