Corte Superior a declara confisca 46 bara di oro na balor di mas di 8 miyon florin

Sentencia den apelacion caso Alpina

ORANJESTAD (AAN):   Corte Superior di Husticia a dicta sentencia dialuna 18 di november den e caso ‘Alpina’ contra e sospechosonan R.A.G.Z. y J.C.T.R.

            E caso aki, cu ta conoci como e caso di oro, a sali na cla riba 9 di februari 2018, ora G.Z. a wordo deteni na airport cu 46 bara di oro cu un peso total di 55 kilo, den su ekipahe di man. E tabata na caminda pa Hulanda, cu destino final Dubai. E baranan di oro tabata procedente di Venezuela.

            Na juli 2022 Corte den Prome Instancia a declara e sospechosonan G.Z. en T.R. liber di falsificacion y labamento di placa. Ministerio Publico a bay den apelacion contra e decision aki.

            Corte Superior di Husticia a destrui e sentencia di Corte den Prome Instancia y a condena e sospechosonan pa respectivamente 113 dia y 6 luna pa falsificacion y labamento di placa.

            Corte Superior a declara e 46 baranan di oro confisca (verbeurd). E baranan ta representa na e momento aki un valor di mas cu Afl. 8 miyon.

            E consecuencia cu e baranan di oro a wordo confisca ta cu, unabes e sentencia bira irevocabel, nan lo bira propiedad di Pais Aruba.