Corte Constitucional a aproba acuerdo entre Rep. Dominicana y Hulanda pa delimitacion maritimo

ORANJESTAD (AAN): Informe di Santo Domingo ta indica, cu cuatro voto contra, Corte Constitucional a aproba e acuerdo firma entre Ministerio di Relacionnan Exterior di Republica Dominicana (Mirex),

y Reino Hulandes riba delimitacion maritimo, cu lo bay marca e frontera riba Lama Caribe, unda e islanan di Caribe Hulandes ta situa.

   E sentencia ta declara cu e acuerdo cu a ser haci entre Santo Domingo y Den Haag ta aceptabel bao Constitucion Dominicano, riba e legitimacion maritimo, cu a wordo firma na Santo Domingo dia 5 di Juli 2021.

   Pero e sentencia a inclui e votonan contra di e huesnan Manuel Ulises Bonnelly Vega, Domingo Gil, María del Carmen Santana de Cabrera, y José Alejandro Vargas Guerrero.  Nan a vota contra, pasobra nan ta haya cu e acuerdo cu Hulanda ta desfaborabel pa e interes maritimo di Rep. Dominicana, segun José Alejandro Vargas Guerrero a bisa.

   Apesar di esey, e sentencia ta mustra cu e decision a wordo acepta pa e mayoria di huesnan rekeri pa aproba e acuerdo.  E acuerdo a wordo firma pa Ministro di Relacionnan Exterior, Roberto Alvarez, y Embahador di Hulanda, Annemieke Verrijp, y a establece cu e delimitacion di tur zonanan maritimo lo wordo pinta “basa riba equidistancia”.

   E lo bay ta e liña geodesico forma pa e puntonan identifica pa nan coordinadonan geografico expresa den e World Geodetic System reference system di 1984.