Contract cu dentista Zeraida M. Romero na Santa Cruz a termina

AZV ta informa:

Lo haci traspaso automatico pa esnan asegura 

ORANJESTAD (AAN): Diamars atardi, Organo Ehecutivo AZV a informa tur asegurado inscribi cerca dentista Zeraida M. Romero pa tuma nota cu e contract entre OE AZV y dentista Zeraida M. Romero ta finalisa 31 di October 2024.

   Nan ta gradici dentista Romero pa su añanan di servicio cu su persona a brinda na e aseguradonan di AZV.

   Traspaso automatico: Entrante 1 di november 2024 OE AZV ta percura pa un traspaso automatico pa dentista M. Rasmijn na Santa Cruz. Esaki ta sosode automaticamente (digitalmente). E asegurado mes no tin nodi haci nada. Pa wak e traspaso automatico, e asegurado ta bay den e AZV-app. Bo ta bay riba Menu→ Dunadonan di cuido→ E dunadonan di cuido di→ Dentista. Bou di e bloke ey lo wak e nomber di e dentista nobo.

   No ta di acuerdo: Den caso cu e asegurado no ta di acuerdo cu e traspaso automatico aki, tin tur oportunidad pa inscribi cerca un otro dentista cu ta disponibel. Pa haci cambio e asegurado ta bay riba e website di www.azv.aw pa yena e formulario cu peticion pa cambio.  Of bo por haci esaki riba e App tambe.

   Den caso cu bo persona a haci e cambio caba, esta cu bo a cambia caba pa un dentista di bo propio escogencia/preferencia, e ora no mester haci nada. E informacion di bo dentista lo bo wak despues den e AZV-app.