The content originally appeared on:
Diario
Eleccion 2025 mester duna sosten na continuacion di recuperacion
*Conseho Raad van Advies lo a evita e debe nacional di Mike Eman
*Parlamento ta Voz di Pueblo si e scucha expertonan paga pa Pueblo
ORANJESTAD (AAN) — Pa Aruba ta sumamente importante cu e Conseho di Supervision financiero di Reino, a expresa su mes riba e forma ehemplar cu Aruba a hiba su maneho financiero y cu segun su relato mester haya continuacion.
Cu otro palabra, e Comision di Supervision Financiero di Reino, ta di opinion cu Aruba a haci un bon trabou y cu awor e placa cu Aruba tin disponibel por yuda baha e debe nacional di e pais.
Pa un pais por sigui traha riba su futuro, e mester profundiza den loke a bay robez den pasado y a haci cu awe, por ehempel, Aruba no por baha belasting of tin mas fondo disponibel pa asisti grandinan pero tambe muchanan cu mas facilidad.
Di acuerdo cu hasta e recomendacion di CAFt, mester tin continuacion di e maneho cu a conduci na e logronan financiero di Aruba.
Pa duna garantia di continuacion di bon maneho financiero di e pais manera e Comision di Supervision di Reino a recomenda, mester evita cu Aruba ta bolbe cay den abismo cu el a conoce for di 2014, cu tabata tin su base den e maneho dirigi di Gobiernonan di Mike Eman, cu a bay contra tur principio di bon gobernacion y a dicidi di crea un debe nacional, pa awe Pueblo paga, manera Gobierno Mike Eman mes a splica den pasado.
Pa a bay contra interes financiero di Aruba, Gobiernonan Mike Eman a trapa riba e proteccion cu e sistema legal ta entrega na e votadornan di e pais.
Ta contra conseho di Raad van Advies y experto, e mayoria absoluto di Mike Eman den Parlamento, a baha e entrada di BBO di Aruba cu mitar, loke a haci cu awe Pueblo di Aruba mester paga e debe y no por goza di e recuperacion financiero cu Gobierno Evelyn Wever-Croes a logra pa e pais.
Loke a pasa na 2010 tabata sumamente serio y ta duna prueba di e forza destructor di arogancia politico di Gobierno Mike Eman, cu na tur nivel a destrui Aruba.
Como Prome Ministro di Aruba, Mike Eman mes mester a admiti na 2010, cu e no por deshaci di BBO completamente pero si a laga Aruba cu necesidad pa reemplaza e entrada di BBO mescos cu di otro fuentenan cu a wordo cera ora e introduci BBO.
E poder politico cu eleccion a entrega na e mayoria di AVP na 2009, a bira e instrumento cu cual, contra conseho di expertonan cu Aruba ta paga pa sostene un bon gobernacion financiero, a destrui e base financiero di Aruba.
E mayoria di Gobierno di Mike Eman, cu na 2009 a haya poder na Aruba a base di e promesa falso cu por deshaci di BBO cu Mike Eman mes no por a cumpli cune, a deshaci pues di loke expertonan di Colegio Halto di Estado, a adverti y asina a entrega Aruba na e caida financiero total cu a duna Hulanda e poder pa deshaci di e Status Aparte financiero di Aruba.
Pa Aruba duna continuacion na su logronan cu a costa Pueblo di Aruba sacrificio for di 2018 a base di Gobernacion dirigi dor di Prome Ministro Evelyn Wever-Croes y cu awe ta culmina den Reino, e mester awor deshaci di e posibilidad pa den futuro locura politico manera a pasa na 2009 cu Mike Eman, haya otro oportunidad pa destrui e base di bienestar di Aruba.
Mester revisa e leynan cu ta sostene e papel importante di Raad van Advies, cu mester duna e asistencia experto pa cual Pueblo ta paga, na politiconan den Parlamento.
Algemene Rekenkamer Aruba, cu mester vigila e forma cu placa di Pueblo di Aruba ta wordo uza den cuadro di Ley di Contabilidad, mester bira realmente un tribunal, cu forza pa actua na e momento cu politiconan por destrui e bienestar financiero di Aruba.
E tarea mas grandi cu ta sconde den eleccion di representantenan di Pueblo na 2025, ta entrega garantia, cu manera CAFt mes a splica, e logro grandi di recuperacion di Aruba ta continua.
Pa esaki mester di e asistencia total di expertonan di Aruba, cu hunto cu Parlamento ta forma e Colegionan di Estado.
Manera historia a demostra esaki solamente ta posibel, si cambia Leynan di tal forma cu ta evita e politica barata di 2009 di Mike Eman cu no por a ni cumpli cu su promesa di deshaci di BBO, pero si a deshaci di felicidad di Aruba, di awe goza plenamento di recuperacion na man di Gobierno Evelyn Wever-Croes.
