Como un partido nobo den e escena politico di Aruba, LpR a bin cu un politica completamente diferente

Lider di Lucha Pa Reforma, Rycond Santos Do Nascimento:

ORANJESTAD (AAN):   Lider di Partido Lucha Pa Reforma (LpR), Rycond Santos Do Nascimento a presenta diabierna mainta na MFA Santa Cruz pa eherce su derecho di voto.

            El a acudi den compania di su casa, algun colega candidato di su partido, entre nan Rene Wild y Yulieth Roos.

            Den un entrevista cu DIARIO el a duna di conoce cu nan ta masha contento con e proceso di campaña di LpR a bay a pesar di e tempo cortico cu tabatin, "como partido nobo cu mester a cuminsa for di cero pa build-up un nomber den comunidad".

            El a bisa cu for di cuminsamento di campaña hende no tabata conoce e nomber Lucha Pa Reforma y awor si e ta conoci. Awor comunidad tin un bista hopi cla y esey tin di haber cu e decisionnan strategico cu nos a tuma na cuminsamento di e campaña pasobra nos tabata preparando caba pa un campaña cu lo wordo hiba otro aña. Pero na momento cu gobierno a cay esaki a hiba tur cos den un aceleracion y mester a dicidi unda ta bay pone e recursonan y e enfoke pa asina tin maximo impacto, el a agrega.

            El a sigui bisa cu den apenas un luna di tempo LpR por a trece mensahenan di ken nan ta, pakico LpR ta para. A enfatisa cu nan ta conservativo y cu ta para pa norma y balor tradicional, cu ta para contra corupcion, pro un administracion financiero bon pa e pais aki. "Tur hende sa cu nos tin un vision hopi cla con pa tackle e problema economico di costo di bida.

            El a agrega cu LpR a pone enfasis riba e adultonan mayor y tambe medio ambiente. Tin un mescla di prioridadnan cu ta hopi cla.

            LpR a posiciona como un partido centro-derecha y social-democrata, el a indica.

            "E decisionnan strategico cu nos a tuma a haci cu den apenas un luna di tempo nos por a posiciona nos mes. Tur hende sa unda nos ta para. Tur ciudadano tin un escogencia claro pa por scoge un di e bloke".

            Como un partido nobo den e escenario politico di Aruba a bin cu un politica completamente diferente. "Nos tin contenido (...) Nos politica ta uno informativo y educativo mientras cu e otro partidonan politico di un forma of otro ta hibando un politica di populismo, sensacionalismo y emocionalismo", e lider politico a declara.

             LpR y su team ta masha orguyoso di por a haci un tremendo trabao den un forma profesional, semper kedando na un nivel di politica nechi.

             "Independientemente di e resultado di e campaña, locual nan ta wak ta cu tin un campo habri pa nos sigui crece y bira grandi", Santos Do Nascimento a expresa.