Como 14 porciento di automobilistanan no a paga plach’i number den 2024

E ta alarmante

ORANJESTAD (AAN): Durante e 12 lunanan tras di lomba, ta saliendo na cla cu lo tin como 14% cu no tin pago riba nan.  Di cual 3.613 a paga mitar di aña, y 8.859 plach'i number no tin pago di ningun tipo riba nan durante 2024.

   Total pues, 12.472 automobilista moviendo riba caminda no a cumpli cu pago di Plachi di Number pa 2024.  E ta algo asombroso y alarmante.

   Vocero di DIMP, Meverly Romano a splica cu pa 2025, e deadline pa pago di bo nummerplaat ta bira Diabierna 31 di Januari 2025.  Esey ta e deadline di tur aña!

   Si bo paga bo nummerplaat riba Dialuna 3 di Februari 2025, tuma nota cu ya bo ta laat y lo bo haya automaticamente un boet di 50% imponi extra riba e cobranza.

   Cantidad di number registra: Pa henter aña 2024, en total Departamento di Impuesto tin pa henter Aruba, un registro di 92.803 number.   Y pa fin di December, nan tabatin 86% di e numbernan aki paga.

   Pues riba Aruba, tin un total di 79.717 auto cu si ta coriendo legalmente riba caminda cu nan impuesto full paga.

   Nan lo no por paga 2025: Vocero Romano a papia claramente, cu e 12.472 automobilistanan cu durante 2024 no a bay paga nan plachi number ni mitar aña y tampoco full aña, pa awor cu ta bin cu plachi number blauw, e clientenan ey lo no bay wordo permiti pa paga e nummerplaat belasting di 2025, tanten cu nan no cumpli cu e pago di 2024 prome.

   Pa colmo, segun DIMP tin algun persona cu tin debe no djis di 2024, sino di añanan anterior tambe.  A mira casonan di hendenan cu a paga nan nummerplaat belasting di 2020, y despues a paga nada mas!  Pues ningun pago pa 2021, ni 2022, tampoco 2023, y mucho menos di 2024.  Pero ainda nan ta coriendo cu plachi di 2020 cu ainda ta valido.

   E personanan aki pues tin debe di par di mil Florin riba nan nomber.  Si nan tin mas auto riba nan nomber, e debe ta aun mas grandi.  Pues e personanan aki lo mester cumpli cu e pago di debe atrasa prome cu nan ta wordo permiti pa paga e impuesto nobo di 2025 pa nan haya e plachi nobo.

   Pesey mes, semper Departamento di Impuesto ta keda haci suplica riba automobilistanan pa nan no pospone e pago, pasobra despues e lo bay cay mas pisa, y awor cu ta bin plachi nobo, e peso lo bay sinti mas duro.  Gastonan extra cu ta cay riba bo cartera, pasobra bo no ta debe djis e cierto suma so, sino e boet pa cada biaha cu bo a keda sin paga.  Bo ta bay haya bo ta paga extra hopi mas placa di loke originalmente bo mester a paga.  Y e suma cu bo a keda debe, nan lo cobra 6% di interest cada aña.  Y tur esaki ta algo cu nan ta suplica ciudadanonan pa den Aña Nobo 2025 pa cumpli cu pago di impuesto, manera cu ley ta stipula.

   Y corda cu pa pago di Nummerplaat Belasting, no ta aplica ningun “areglo di pago”.  Pues bo tin di paga e debenan atrasa un solo vez.