Comerciantenan Uni no ta di acuerdo cu ta elimina belasting riba tip

Frans Ponson: --- *E resto di pueblo si tin cu sigui paga belasting!

ORANJESTAD (AAN):  E grupo di Comerciantenan Uni Aruba (CUA), a yama un conferencia di prensa un biaha mas pa asina trece un preocupacion nobo cu nan tin.

            Frans Ponson, representante di CUA a bisa cu nan a tuma nota cu gobierno a tuma e decision di no bay cobra impuesto riba tip.

            Nan ta preocupa pasobra e proposicion di cobra impuesto riba tips tin añanan ariba mesa di gobierno y no tin ningun gobierno cu kier a tuma e posicion pa haci'e, a bisa.

            Ponson a agrega cu ora cu algo ta bon, por ta no mester, pero no ora un pais ta den crisis. Tin un tin un debe astronomico y ta bay cobra pueblo tur e placa di tur e debenan cu tin y esey kiermen cu tur hende tin cu contribui.

            El a enfatisa riba con ta bay bisa sector priva y tur hende cu tin un salario na Aruba cu no ta bay cobra riba tip. El a pone e tema den perspectiva pa comunidad compronde riba kico e ta papiando.

            "Si cobrando belasting ariba  tips ta bay trece un bedrag aden, si e no bay bin, e resto di pueblo ta bay pag'e", a remarca.

            Den sector turismo, mayoria di hende ta riba salario minimo y nan ta haya tips. No ta papiando di e 'cash' cu ta drenta ya cu no por controla esey. Ta papiando specificamente di tur cos cu ta wordo paga cu 'credit card', a bisa.

            Na final di dia, e comerciante ta bay duna e trahador fin di luna e placa ey. Den comercio no conoce e cos aki, a señala. E ora comercio tin cu bay puntra pakico nan trahadonan cu ta haya bonus, pakico nan no por bay hay'e sin paga loonbelasting?.

            Segun Frans Ponson e asunto aki ta sona absurdo y cu e trahadornan den comercio nan tambe mag haya nan 'fair-share' y sin un ta hay'e otro hay'e.

            El a expresa cu awor e comerciantenan tin cu pensa di bay duna nan trahadornan un 'gift card' fin di aña pasobra si ta duna nan un 'gift card' e ora ey nan no tin loonbelasting riba dje.

            A subraya cu no ta husto cu e pagador di belasting tin cu bay paga mas belasting pasobra un grupito no ta paga belasting.