Coalicion sin MEP a bira mision imposibel!

Campaña politico 2024 a drenta su fase final cu un bista cla

*Segun sondeo di DIARIO actualmente MEP cu mas cu 50% di voto

*Mester clasifica AVP como partido chikito cu no por dirigi ni oposicion 

ORANJESTAD(AAN) — Aruba ta confronta uno di su eleccionnan mas importante den su historia.

Sin promesanan falso, manera eliminacion di BBO na 2009 di parti di AVP, pero cu promesanan cu por wordo cumpli a base di hasta compromisonan cu Reino y pagonan di interes riba debe, e continuacion di e actual gobernacion, por wordo sigura.

Ora papia di e actual gobernacion, ta papia di e trabou produci pa Gabinete Evelyn Wever-Croes, basa riba programanan di accion cu mr. Evelyn Wever-Croes como dirigente politico di Aruba, a presenta na partnernan cu cual el a forma coalicion.

Cumplimento di dos programa di Gobierno dirigi pa Evelyn Wever-Croes a trece cambio drastico den e produccion di dos Gobierno di Mike Eman, cu na final a destrui su mes segun tur informacion concreto den mundo politico na Aruba.

DIARIO cu expertonan ta discuti e situacion actual na Aruba, caminda hasta ta trata di haci votadornan kere cu ta posibel pa despues di eleccion 2024, tene Evelyn Wever-Croes pafor di Gobierno y asina produci un Gobierno di partidonan mas chikito so.

E informacion aki ta basa riba e cantidad di partidonan cu a presenta nan mes na Aruba na 2024.

Sinembargo, Miles di partido por presenta nan mes na e pais y hasta participa na eleccion pero esaki no ta haci cu tin e cantidad di posibilidad pa forma Gobierno, manera kier haci Pueblo comprende.

Sondeonan cerca votadornan ta duna un bista cla cu na e momentonan aki MEP dirigi pa mr. Evelyn Wever-Croes, por conta cu cu sigur mitar di e cantidad total di votonan di Pueblo di Aruba.

E informacion aki, basa riba Ley cu ta dicidi na Aruba, ta haci cu si MEP haya por lo menos e mitar di cantidad total di voto di Aruba, no por tin Gobierno sin participacion di MEP.

Leynan ta papia di un representacion mayoritario den e Gobierno di Aruba, cu ta wordo forma dor di e cantidad di votonan cu por wordo acumula sea dor di un partido cu a haya mayoria di voto of dor di mas cu un partido, cu ta forma un coalicion.

Na momento cu parti for di e punto cu tur investigacion y sondeo actual lo produci na Aruba si e ta basa riba honestidad di informacion, MEP si na e momentonan aki eleccion wordo tene, lo tin mas cu mitar di e votonan di Aruba.

Esaki ta nifica cu pa e otro partidonan ta resta menos cu mitar di e cantidad di asiento den Parlamento cu Ley ta exigi pa por forma un Gobierno.

Loke ta sumamente remarcable ta na e momentonan aki, cu informacionnan ta alcansa votadornan cu ta wordo presenta cu un formula cu ta indica, cu AVP ta capaz na forma un base pa Gobierno dirigi pa Mike Eman.

Realidad di AVP na e momentonan aki ta sinembargo, cu AVP a bira un partido chikito cu menos voto cu otro partidonan, cu na un distancia considerabel, ta sigui MEP como partido mas grandi.

Si bay tras di informacionnan cu ta drenta pues na e momentonan aki AVP, hunto cu e otro partidonan no ta alcansa e cantidad di voto cu MEP so lo a haya cerca votadornan.

Tur informacion ta mustra cu AVP no por wordo considera un partido grandi na Aruna segun tur interpretacion di Ley cu ta splica bon cla kico ta nifica un mayoria basa riba resultadonan di eleccion.

Si analisa indicacionnan, e partido Futuro di Gerlien Croes ta na segundo lugar. Kico lo pasa si e partido di Gerlien Croes ta un forma pa desvia votadornan pa despues uni cu AVP, manera for di su nacemento ta bini dilanti den Pueblo debi na e union sumamente importante cu tabata tin entre Mike Eman y Gerlien Croes, mas cu a surpasa e relacion entre Mike Eman y Rycond do Nascimento?

Hasta si ta pa desvia atencion di votadornan e partidonan cu antes tabata AVP, a nace, nan no por forma un coalicion cu AVP a menos cu nan y AVP hunto ricibi mas cu mitar di votonan di Parlamento pa asina forma un mayoria.

AVP manera por a spera, na e momentonan aki sigur no ta goza di confianza di Aruba pa Mike atrobe haya e cantidad di voto cu el a ricibi den pasado y a haci cu e por a forma Gobierno sin otro partido.

Segun informacionnan den Pueblo na e momentonan aki, MEP ta e unico partido cu por considera su mes como partido grandi.

AVP lo bira partido chikito, mientras ta spera cu manera cifranan te awor ta indica cu e derivado di AVP, cu ta Futuro di Gerlien Croes, lo por cualifica pa un partido mediano y no grandi.

AVP lo mester bay uni forsa cu e partidonan mas chikito sigur despues di e falta di direccion cu ta existi den e partido, cu no por splica Pueblo kende realmente ta su lider.

Kico eleccion lo haci cu Raiz ta keda un pregunta grandi. Na e momentonan aki hasta tin indicacion cu Raiz lo no bolbe den Parlamento di Aruba.

Segun leynan di Aruba ta e deber di partidonan pa splica Pueblo e contenido real di nan partido y reglanan di ley pa nan participa na eleccion.

Manera tur indicacion ta actualmente, e partido e grandi di Aruba ta MEP, cu un cantidad di voto cu ningun otro partido sigur ta acerca y cu cambionan grandi pa AVP cu lo cualifica como partido chikito!