CMO a pone enfoke riba presupuesto y preparacion pa crisis den reunion den Parlamento

Director di CMO, señor Rino Hermans:

ORANJESTAD (AAN): Director di Crisis Management Office (CMO), señor Rino Hermans, den un entrevista cu DIARIO a duna di conoce cu durante un presentacion pa miembronan di Parlamento diaranson mainta, CMO a informa nan kico Parlamento mester tene cuenta cu ne pa loke ta trata e presupuesto di e oficina di maneho di crisis. Nan a haya informacion riba e posicion fuerte y esun swak di CMO y na unda mester duna mas atencion.

   E parti financiero, segun señor Hermans, tabata unda cu e Parlamentarionan a mustra mas interes pa haya mas informacion. Esaki ta keda hunga un rol importante pa nos economia cu ta depende primordialmente di turismo na unda cu cualkier shock internacional ta impacta entrada financiero di Aruba.

   Parlamentarionan a puntra kico mas y cuanto mas Aruba tin mester pa nos ta bon prepara. CMO riba su mes no tin fondo pa fortifica e conocimento y capacidad pa responde den un crisis pa otro organizacionnan tambe. E tarea di CMO ta pa coordina y organiza tur otro dienst na Aruba. Y si e dienstnan tampoco haya fondo pa maneho di crisis, nan lo mester depende riba CMO cu tampoco ta ricibi e fondo aki.

   Na final, tanto Presidente di Parlamento como tur Parlamentario a expresa nan interes pa fortifica e capacidad di crisis na Aruba y a expresa nan deseo pa reuni mas biaha cu CMO riba e tema aki.

   Señor Hermans a remarca cu el a sali satisfecho di e intercambio cu Parlamentarionan diaranson mainta, na unda preguntanan tabata al caso y Parlamento a haya un otro imagen di e puntonan fuerte y e puntonan unda mester haya atencion di CMO. Parlamento a keda sorpendi di e plannan cu CMO tin, no solamente riba papel, pero den practica.