Claudia Daher-Ponson a ricibi gran acogida cu su buki R.A.T.S, na Super Do it Center

Durante evento pa celebra Aruba su Dia Nacional:

ORANJESTAD (AAN)-- Cu gran acogida,  autor di “R.A.T.S” (Revolutionary Army of Teens- We Are One), Claudia Daher-Ponson, a presenta su obra aki na e publico durante e gran evento cu a tuma luga na Super Do it Center, Diaranson 18 di Maart, cu a wordo conmemora e di 50 aña di nos Dia Nacional Himno y Bandera y e di 40 Aniversario di Aruba su Status Aparte.

Den un entrevista cu Matutino DIARIO,  autor di R.A.T.S a menciona cu e obra aki ta papia di tur e hobennan teenager di mundo, cu ta uni pa salba e planeta di tur e cosnan negativo cu ta sosodiendo. Nan ta uni pa traha hunto. “E buki ta elabora riba inteligencia artificial, cambio climatico y union global. Esaki independientemente di nan religion, nivel social, raza, etc. E hobennan ta e unico forsa cu por ataca tur loke ta biniendo pa daña e planeta, y cu ta nos mes for di milenionan atras”, Daher a bisa. E buki ta papia di unidad, balor familiar.

Señora Claudia Daher a gana un premio na New York, ta recore mundo, Australia, Japon, henter Europa, Merca y America Latina y el a yega cerca diferente actor famoso di Hollywood. E buki a wordo publica na London.

“E protagonista ta Arubiano, anto e muchanan ta sali for di Aruba pa salba e planeta y pa duna ehemplo, pasobra aki na Aruba nos no ta mira e diferencia di color, di color, condicion social, y nos tur ta biba na paz”, e dama a subraya.

E buki aki ta un combinacion di ciencia ficcion y realidad, y e storia ta culmina na 2024, y e ora ey e lector ta bay mira kico ta bay sosode cu nos planeta.

“Nos ta wak kico ta sosode cu e mundo aworaki: guera, falta di respet, tin diferencia di religion, y e buki ta trece tur cos pa trece amor bek y pa Dios, pasobra si Dios ta uno, nos ta uno”, Claudia Daher a acentua.

R.A.T.S “Revolutionary Army of Teen” desde su lansamento na 2024 a bira un exito rotundo, globalmente.