Ciclista herida ora a mara liña fini di nylon como trampa riba pista di bicicleta riba Green Corridor

ORANJESTAD (AAN): Kizas e ta algo “pret” pa algun hoben baldadi na Pos Chikito.  Pero pa autoridad e tipo di chansa aki no ta aceptable y mucho menos algo pa hari riba dolor di otro.

   Pa cortesia di 297Sports, DIARIO a haya sa di un situacion super peligroso riba e pista pa ciclismo cu ta pasa riba Green Corridor na Pos Chikito den cercania di rotonde.

   Dialuna mainta un persona kizas pa ‘pret’, a colga y rek un liña di nylon fini for di un banda te na otro banda, net riba e pista di bicicleta.  E liña aki ta dificil pa mira.

   E malhechor a mara esaki na forma strak, den un tipo di trampa pa ciclistanan pasa y dal den dje.

   Esey ta exactamente a socede, ora cu ciclista femenino cu speed halto, a pasa dal su garganta na esaki cu e consecuencia cu el a haye ta stop abrupto, casi dal dal abao, mientras tur su garganta a keda marca.  Su dedenan tambe a haya corta di e liña blanco.

   Un situacion hopi peligroso cu por a resulta fatal mirando e liña di nylon por cortabo mahos.

   E dama a keda cu algun mancha y herida ora el a dal den e liña.  Bon mes cu nada mas serio a socede cune riba e bicicleta.

   Cualkier persona cu por tin informacion kende lo por a pone e liña fini aki riba Dialuna mainta pa herida hende inocente, por yama Tipline di Polis na 111-41.