Centro di Bario y Deporte Dakota cu fundraiser pa construi rampa special

ORANJESTAD (AAN): Centro di Bario y Deporte Dakota ta preparando un evento pa recauda fondo riba 3 di Januari y

durante un conferencia di prensa Carmichael Bikker a splica cu esaki ta un evento cu tabata tey ora e y Glenrick Ridderstap a drenta bestuur tabata tey, pero e tabata drumi den lachi pa hopi aña.

“Nos a dicidi di tume over, door cu e club a bira asina activo y hopi hende di edad halto ta yegando na e club”.

E trapinan pa drenta e centro di bario a bira un peso pa nan y pesey e actividad aki ta bay ta importante pa yuda drecha esakinan, segun Bikker.

El a splica cu e diseño pa e trapinan ta di Rafi Kock di Dakota mes y cu el a dicidi di regala e centro di bario e diseño.

“E proyecto ta nifica un embeyecimento di e parti dilanti di Centro di Bario Dakota y e ta bay cambia, unda cu nos ta bay traha un rampa hopi special pa e hendenan cu ta den rolstoel, ta cana cu walker y tin problema di drenta”.

E rampa ta bay pone cu tur hende por drenta e centro di bario facilmente, segun Bikker.

El a splica cu e proyecto tin un costo basta halto y pesey e fundraiser tin cu yuda den esaki.

Bikker a gradici diferente instancia y compania,  incluyendo Cede Aruba y Bario Unico cu a yuda cu comienzo di e proyecto.

El a indica cu te hasta e comerciantenan chikito di den bario mes ta aporta y esey ta algo cu ta wordo aprecia tambe grandemente.

Ridderstap tambe a hiba palabra y el a splica cu e parti grandi di e fundraiser ta un Bingo cu ta cuminza 7:30 di anochi, pero portanan ta habri 6:30 caba.

E intencion ta pa trece e hendenan di bario bek den e centro di bario y pesey no a haci e Bingo algo online.

Ta bay tin diferente premio di Bingo, mientras cu e premio gordo mes di e full card ta bay ta di 4000 florin.