1985 a entrega Aruba e final historico mas doloroso di un lucha
*Placa por a sigui lora cu e productor di logro condena na olvido
*E herencia solido di Betico Croes a permiti creacion futuro nobo
ORANJESTAD(AAN)—Aña 1985 tabata yega na su final. E ultimo horanan di Aruba como Teritorio Insular den e concepto estatal di Antia Hulandes, a wordo anuncia cu un solo cu tabata baha den laman y inicio di un anochi, cu lo a marca historia di Aruba na un forma cu nunca hende lo por a idea.
Aruba tabata prepara pa acepta su Status Aparte cu cambio di dia, sin e saber cu Dia Prome di Januari 1986, no solamente Aruba lo a drenta e era e Status Aparte, pero cu nunca mas Aruba lo por a goza di presencia bibo di Betico Croes, e Arubiano cu a entrega su pais e logro grandi di Status Aparte.
E preparacionnan cu por a wordo spera na e pais, tabata diferente di loke segun historia nan mester tabata, pasobra den porta di e realizacion di su Status Aparte, Aruba a wordo informa cu e refineria Lago lo a cera su portanan.
E anuncio aki realmente tabata tin tur ingrediente pa pone un fin na Status Aparte of en todo caso habri porta pa algun di e areglonan mas importante manera e autonomia financiero di Aruba, wordo paraliza.
E tremendo organisacion di e futuro estatal di Aruba bou e guia directo di Betico Croes y expertonan cu tabata encarga pa ehecuta na forma profesional e realizacion di e acuerdonan fiho cu a wordo alcanza cu Reino, a haci cu Aruba por a cuminsa traha riba realisacion di un futuro sin refineria, aunke naturalmente den e prome fase lo mester a tuma medidanan pa e pais sigui funciona.
E realizacion di Status Aparte di Aruba, no tabata un cargamento emocional of di deseo, pero un preparacion debido pa asina e salida di Aruba di Antia y e nacemento di e Aruba nobo, asegura continuacion di condicionnan solido di bida di e Arubiano.
E ciere di Lago a pusha Aruba contra muraya pero e trabounan inmenso cu a wordo haci bou liderazgo di Betico Croes, e ultimo Bestuurscollege di Aruba y e expertonan Arubano cu sosten necesario, a evita cu por a sigui cana riba e caminda di Status Aparte aunke mester a introduci un suma di belasting adicional pa por a cubri e necesidadnan social nobo di e pais.
Sinembargo, ta hustamente e hecho cu Aruba pa medio di Status Aparte na un forma directo (sin necesidad di pidi aprobacion di Antia Hulandes) por a tuma medidanan pa e por a confronta e problemanan social cu a presenta, a habri porta pa Aruba na un forma autonomo, haya su recuperacion manera na 2024 a bira tambe e caso cu e situacion financiero di Aruba cu a wordo rescata dor di Gobierno Evelyn Wever-Croes.
Status Aparte di Aruba a wordo realiza cu cambionan politico grandi ora e anuncio di Lago a sirbi directamente pa partidonan cu tabata contra Status Aparte y a opone Betico Croes na Conferencia Mesa Redonda na 1983, a venena Pueblo contra Betico Croes y hasta a plama e informacion falso cu ta pa motibo di Betico Croes, Lago a cera su portanan.
Ta cu e ekiponan gubernamental cu Betico Croes a garantisa den e diseño di Status Aparte, mester a realiza programanan cu enemigonan politico di Betico Croes tabata entrega na Pueblo.
E Pueblo di Aruba a wordo ciega contra Betico Croes, kende a perde un parti grandi di voto durante eleccion 1985 pero a gana eleccion cu un mayoria cu tabata exigi sosten.
Partidonan contra Betico Croes, a crea un coalicion y a base di nan promesanan pa restablece Aruba, a entrega na opositornan di e lucha di Betico Croes, e loke tabata logro di Betico Croes.
Por papia aki di ladronicia di merito?Un pregunta cu ta keda na e concenshi di tur cu ta parti di loke a pasa na 1985 ora e robo politico di un logro a schrap e tata di Status Aparte, Betico Croes, pa entrega pais Aruba na su opositornan.
E Leynan cu Aruba a hereda di Betico Croes, e libertad cu Betico Croes a logra pa Aruba mes dicidi pa su destino, a haci posibel cu otro partidonan politico a uni y forma e prome Gobierno di e pais autonomo Aruba.
A base di e cuadro di leynan, e Gobierno propio, tur logro di Aruba pa medio di e lucha y trabou di Betico Croes y e expertonan Arubano cu el a inspira y dirigi como consehero di gobernacion di Aruba, dia Prome di Januari 1986, Aruba como pais autonomo den Reino, por a habri porta pa un futuro nobo.
Na e momento cu celebracionnan tabata tuma lugar, un avion a lanta vuelo na aeropuerto. A bordo tabata tin un Betico Croes, cu no por a lucha mas ni pa su bida. Nunca mas e lo a mira Aruba. Nunca mas e lo a mira e pais autonomo, cu tabata su creacion y su logro pa tur Arubiano cu ya a nace of ainda mester a nace!
