Celebra Dia di Betico dia 25 di januari 2026 riba Plaza Libertador Betico Croes

ORANJESTAD (AAN):  Riba diadomingo dia 25 di Januari 2026 lo tin e Acto Protocolar cuminsando pa 8:30 am caminda lo tin presencia di Gobernador di Aruba,

mandatarionan, famia y demas invitadonan pa refleciona y recorda e trayectoria di sr. Betico Croes d.f.m.

E manifestacion cultural ta cuminsa pa 7:00 pm caminda lo por disfruta di un dushi ambiente pa famia, obra, arte, musica y e famoso tentnan cu cuminda y pasabocanan crioyo. Tentnan lo ta habri caba pa benta for di 6:00 pm. Pueblo di Aruba ta keda cordialmente invita pa asisti na e celebracion di Dia di Betico 2026 organisa pa Comision Celebracion Dianan Nacional (CCDN) conhuntamente cu Gobierno di Aruba.

Prome Minister mr. Mike Eman durante conferencia di prensa a expresa cu "Unda cu nos ta awe, ta grandemente pa motibo di esfuersonan grandi cu luchadornan cu den pasado ( nos antepasadonan ) a haci, caminda sigur un personalidad a marca nos historia, Señor Betico Croes, cu na momentonan husto den historia di Aruba, a carga un lucha cu tabata biba pa decada den curason di nos comunidad"

E biaha aki ta recorda no solamente su fecha natal pero tambe den contexto di 40 aña di Status Aparte, na cual el a haci un contribucion sumamente importante. Fecha di 25 di januari ta para keto pa e personalidad grandi Betico Croes, pero na mes momento ta para keto riba e 40 aña di nos Status Aparte y tur e lidernan y pasado importante, cu a haci cu Aruba awe tin un presente prometedor y futuro cu oportunidadnan grandi.

CCDN a prepara un tremendo repertorio caminda lo combina musica, obra y arte di nos hendenan pa asina celebra Dia di Betico grandemente. Lo bay tin entre otro presentacion di bailenan folklorico di nos ritmonan folklorico manera tambu, wals, mazurka, danza y tumba produci y coordina pa sr. Freddy Tromp. Un potpourri di cancionnan dedica na Betico interpreta pa sra. Rachel Kraaivanger.
Sr. John F. Montoya lo relata e bida profesional di Betico den un bunita obra teatral.

Arubaanse Muziek School (AMS) tambe lo presenta un potpourri di cahanan di orgel, un produccion coordina pa sr. Arthur Kelly y sr. Carlos Bislip. Durante e anochi aki tambe lo rindi honor na 2 gran artista, musico, cantante y compositor, e legendarionan sr. Robert Jeandor d.f.m. y sr. Casin Giel pa medio di un potpourri presenta pa sr. John Francis Jacobs. Pa finalisa e anochi lo bay tin un presentacion di Touch of Steel y invitadonan manera figuranan popular den e mundo di Caiso y Soca.
E banda popular pa clausura e anochi lo ta “Groove Masters” cu lo percura pa e ambiente final. Bin cu famia y celebra Dia di Betico riba Plaza Betico den un ambiente cultural acompaña pa nos dushi plato y pasabocanan local.