CEDEHM a realiza un sesion di diseminacion cu tur Hefe di departamento den veld social

Miangela Ras, directora, ta splica:

ORANJESTAD (AAN) – Tur director di departamentonan publico a haya un presentacion for di CEDEHM, unda a disemina na veld social, hunto cu Universidad di Aruba y otro stakeholders, e policy cu a wordo compila y traha pa un Comision, cu ta consisti di Magaly Maduro, Keanneh Krozendijk, Lindy Croes y Carlos Orman.

            Miangela Ras, directora di CEDEHM (Centro di Educacion di Hende Muher) a splica cu e policy aki ta pa cumpli cu convenionan cu Aruba a ratifica, den e caso aki eradicacion di violencia di hende muher adulto y mucha muher.

            E situacion na Aruba ta keda preocupante, y pesey tur e stakeholders a bin hunto, segun señora Ras, pa haci un yamada na e union y wak con ta bay traha hunto, pasobra solamente asina, por frena esaki.

            “Un opdracht no ta algo cu ta sali di bo curason. Dus e yamada ta sali di nos curason, di nos concern, y di e vocacion pa cual nos a drenta e veld aki. Di eynan e ta sali no di un opdracht, pero di e compromiso cu bo tin cu bo pueblo pasobra bo a scoge pa tin e compromiso aki cu bo pueblo”, Miangela Ras a subraya.

            E meta ta pa cumpli cu e compromiso inmediatamente. P’esey tur e directornan di departamento a wordo invita pa un sesion di diseminacion. E fondo pa ehecuta e proyecto aki ta cay na cada departamento of instancia pa hinke den nan presupuesto.

            “Esaki pa nos por tin fondonan pa nos por draai e programanan pa eradica violencia contra hende muher”, el a agrega.

            E influencia di diferente cultura por hunga un rol na Aruba, pero aworaki no ta solamente e aspecto multicultural, pero e social media y otro factornan cu a bin hunto y envolve nos cultura, ta hunga un rol. Encuanto e efecto riba nos hobennan, Miangela a señala cu tin cu empodera e personanan pa no laga ningun hende eherce conductanan toxico pa cu ne.

            E proyecto aki CEDEHM a present’e na Minister Presidente un luna pasa. Anto el a acept’e, bay door di dje, y el pidi nos pa tin un sesion di diseminacion cu veld.