Castigo combina y boet pisa pa grupo envolvi den traficacion di hende

ORANJESTAD (AAN): Ayera mainta e dama B.S.C., e homber E.T.S., e dama R.H.M. y e homber C.T.S. a presenta dilanti Hues pa scucha nan sentencia.

Ministerio Publico ta haya nan culpabel di traficacion di hende for di Colombia caminda tabata laga damanan di Colombia bin Aruba y traha na nan cas. Tin di nan Hues ta haya culpabel di traficacion di hende y otro di a tuma hende ilegal den servicio.

FISCAL

Tratamento di e caso a tuma lugar aña pasa 12 December 2025 caminda Fiscal a bisa Hues cu e ta haya nan culpable di traficacion di hende caminda a trece damanan di Colombia y laga nan traha ilegal, sin permiso y sin aseguro medico. Fiscal a bisa cu e grupo aki a crea un circuito di ilegal riba Aruba cu tur consecuencia cu esaki tin pa comunidad. Fiscal ta haya cu e dama B.S.C. tin un papel organizatorio. Door di su situacion di salud, no ta bon pa e bay KIA. Fiscal a exigi un boet di15 mil florin y si no paga, B.S.C. lo mester bay 110 dia sera den prison. Fiscal a exigi 182 dia di prison kitando e 2 dianan cu e tabata sera y e 180 dia ta bira condicional cu 3 aña di prueba.

   Fiscal a bisa cu pa e otro 3 tambe mester haya un boet di 2500 florin y si nan keda sin paga, lo mester bay 35 dia sera. Fiscal a exigi pa E.T.S., 200 ora di trabao pa comunidad of 100 dia sera. Tambe 2 siman di prison condicional cu 2 aña di prueba. Pa C.T.S., Fiscal a exigi 150 ora di trabao of 75 dia sera. Pa R.H.M., Fiscal a exigi 120 ora di trabao of 60 dia sera.

SENTENCIA

Hues a bisa cu 14 Maart 2024 un dama J. a haci denuncia contra B. y E. di traficacion di hende. Investigacion ta mustra cu 3 hende cu a bin for di Colombia, J., D. y C. Investigacion a mustra cu via un abogado di famia, e dama C.S., a regla pa damanan di Colombia bin Aruba como turista y tabata bin traha na Aruba.

   Hues ta haya cu B. tabata envolvi cu 3 dama a bin for di Colombia. Hues ta haya e declaracion di e dama J., kende ta esun cu a haci denuncia contra B., confiabel. Ta door di J., e caso a cuminsa. Pa loke ta trata J. y D. nan no tabatin documentonan pa estadia. Hues a bisa cu door di duna declaracion falso na Inmigracion di a bin como turista siendo cu nan a bin traha, tanto J. como D. tabatin estadia ilegal.

   Hues ta Haya cu e acusadonan a yuda pa e damanan bin keda Aruba. Investigacion ta mustra cu a cumpra ticket y regla estadia na hotel pa nan. Hues ta haya cu e abogado di famia tabata traha segun indicacion di e dama B. y otronan. Pa loke ta traficacion di hende Hues ta haya cu mester tin tambe ganashi. Hues ta haya e dama B. ta complice di traficacion di e damanan J. y D. Pa loke ta e dama C., el a wordo deteni na cas di e dama B. E dama C. a declara cu ta e dama J. a regla tur cos pa e bin Aruba. Hues a bisa cu e ta declara e dama B. liber di lo a regla pa C. bin Aruba.

   Na opinion di Hues, e homber E., a regla cu e dama J. a bin Aruba y traha pa E. Tur esaki el a haci cu cooperacion di e dama B. y e abogado di famia.

   Pa loke ta e dama R., el a yuda di e dama C. pa keda Aruba. El a ofrece e dama C. lugar di keda na su cas y traha pa e dama R.

   Pa loke ta e homber C., Hues no ta haya proba cu el a yuda e dama J. bin Aruba. Pa loke ta e dama C., Hues a bisa cu e no ta haya cu e homber C. a yuda pa e bin Aruba. Si cu e dama C. tabata traha pa e homber C. y R. Hues a declara e homber C., liber di traficacion di hende. Hues ta haya cu e homber C. si ta culpabel di laga e dama C. cu ta ilegal, traha p’e.

CASTIGO

Hues a bisa cu e dama B. hunto cu otronan a percura pa traficacion di hende. Dos dama a bin Aruba y traha na cas di hende. E maneho di castigo pa traficacion di hende ta 10 – 12 luna di prison pa cada hende. Pa cu e castigo, Hues a tene cuenta cu e dama B. ta bibando su so. Hues ta kere cu e dama B. a siña su les y ta haya cu e tempo cu e dama B. tabata sera ta suficiente. Hues a condena e dama B. na 182 dia di prison di cual 180 dia ta condicional cu 3 aña di prueba. Hues a duna un boet di 10 mil florin y si no paga, B. lo mester bay 200 dia sera. Hues a bisa cu e dama B. por paga den 10 luna.

Pa loke ta e homber E. Hues a cuestiona e hecho cu ta busca hendenan ilegal cu ta mina e maneho di Gobierno. Hues a condena E. na 120 ora di trabao of 60 dia sera, si e no traha. Tambe 2 siman di prison condicional cu 2 aña di prueba.

E dama R. y e homber C. a wordo condena na 80 ora di trabao of 40 dia sera y un boet di 1000 florin of 20 dia sera.