Carchinan di votamento ya ta na caminda pa tur hende

Check bon na cua Stemlokaal bo tin di vota!

ORANJESTAD (AAN): Siman a habri y Hoofdstembureau a anuncia cu ya caba siman pasa Diamars 12 di November, Post Aruba NV a ricibi e Carchinan di Voto (‘oproepingskaart’) di Registro Civil y Censo.  Nan lo keda encarga pa parti e Carchinan rond e dianan venidero.

   Ta pidi cada votado pa keda pendiente pa ricibi su carchi di voto na e adres na cual nan ta registra na Censo y warda esaki pa dia di eleccion, 6 di December 2024. E carchi di voto ta contene informacion importante manera:

   (*) Fam, prome nomber y inicial di e votado. (*) Fecha y luga di nacemento di e votado. (*) Adres na cual ta registra na Censo. (*) Dia y ora di eleccion. (*) Number di votado.  (*) Number y adres di e urna electoral na unda e votado tin cu vota.

   Corda cu personanan cu a emigra, fayece, of cu no ta registra na un adres fiho (zonder vaste woon- en/of verblijfplaats), lo NO ricibi nan carchi di voto.

   Si abo ta votador y NO a ricibi e carchi di voto, tuma nota di esaki! Pa votadonan cu no ricibi nan carchi di voto pa dia 28 di November 2024 na e adres unda cu nan ta registra, por busca un duplicado na oficina principal di Censo, situa na Schoolstraat 2.  Entrante 29 di November 2024 oficina principal di Censo lo ta habri di dialuna pa diabierna for di 4:00 pm te cu 6:30 pm. (*) Ta necesario pa mustra un identificacion valido pa por haya bo duplicado di e carchi di voto.

   Hoofdstembureau kier recorda tur votado cu no tin un identificacion valido pa identifica su mes riba e dia di eleccion, pa acudi na oficina principal di Registro Civil y Censo durante e dianan y horario menciona ariba pa renoba bo cedula of bo rijbewijs. E ta importante pa cumpli cu e reglanan y pa cada votado prepara su mes pa participa den e proceso di eleccion.

   Pa mas informacion, bishita e website oficial di Conseho Electoral Aruba na www.er.aw y corda cu e plataforma nan lo sirbi como un recurso importante pa votadonan, candidatonan, partidonan politico y publico general, pa keda al dia cu anuncionan, fecha nan y guia relevante pa e eleccion di Aruba.