Caos na Aeropuerto di Bogota ora cu vuelonan pa Aruba a keda cancela

Atake riba Venezuela

ORANJESTAD (AAN): E cancelacionnan di vuelo riba Diasabra no a djis afecta aerolineanan cu ta bin for di Merca of Europa, pero tambe vuelonan di paisnan Centro Americano y di Latino America.

   E potret aki ta mustra e caos cu tabatin na Aeropuerto El Dorado na Bogota, Colombia, ora cu pasaheronan tabata den sala di salida sperando informacion cu nan vuelo pa Aruba lo continua of no.  Hecho ta cu vuelonan pa Aruba tabata sold-out, debi cu ta monton di hende ta regresando di Colombia despues di a bay pasa cambio di aña, y tambe Pasco na e pais.

   Pero finalmente vuelonan a wordo cancela, y tur hende a keda sin viaha pa Aruba.  Hopi a cuminza pensa cu scol ta start awe, y nan lo no por haya cupo pa regresa nan isla.  Sinembargo como cu Avianca ta un aerolinea cu semper tin avion disponibel, a dicidi cu envez di e 2x vuelo pa dia for di Bogota pa Aruba, riba Diadomingo nan a pone 4 vuelo.  Dos vuelo extra a ser añadi pa trece tur hende di Bogota, esta vuelo AV-5052, y tambe vuelo AV-5054.  Pues tur hende lo tey cla pa cuminza traha awe, y tambe pa muchanan bay scol entrante Diaranson 7 di Januari 2026.

   Mas atardi, a haya informacion cu toch Avianca a cancela un di e vuelonan di Diadomingo.  Pues e ora ta en total 3 vuelo for di Bogota a yega Aruba.