Cantidad grandi di droga di dropping na costa a wordo confisca

Cinco traficante deteni na costa di Aruba

ORANJESTAD (AAN): Wardacosta di Caribe Hulandes, riba Diamars a confirma na prensa di un accion cu a tuma lugar siman pasa Diabierna marduga di 28 di November, Centro Maritimo Operacional di Wardacosta (Centro MOC), a tuma nota riba Marine-Radar di un boto sospechoso nabegando den direccion di Aruba.

   Inmediatamente a tuma contacto cu personal di Steunpunt Aruba cu a sali cu rapidez riba un boto di reaccion rapido, tipo Metal Shark pa analisa e situacion.  Simultaneamente tambe a alerta personal di e avion Dash-8 cu a lanta vuelo pa duna asistencia den combinacion cu un patruya di Wardacosta riba tera. Personal di Cuerpo Policial di Aruba tambe a ser notifica di e caso pa asina tambe sali den direccion nort oost di Aruba.

   E avion di Wardacosta cu aparato sofistica, a logra di localisa e boto den bisindario di Playa Tortuga y inmediatamente a alerta personal riba tera y tambe riba lama.

   Den colaboracion cu miembro nan di Polis, Wardacosta a logra di haya e boto tipo peñero color blauw, cu 2 outboard engine, y abordo monton di baki di plastico conteniendo gasolin, y varios bulto di droga. Autoridad a actua y a detene un total di 5 hende homber. Den nan tabata tin 1 Colombiano y 4 Venezolano.

   Tambe a confisca un cantidad grandi di droga cu a ser destrui.  Lamentabelmente no a notifica e kilahe di e droga, ni si acaso ta cocaina of marihuana, of combinacion di ambos. E potretnan aki pa cortesia di Wardacosta di Caribe Hulandes.