Candela di cas na Residencia Vigia a laga un persona herida atras

Huma preto visibel na Paradera

ORANJESTAD (AAN): Tabata Diamars den oranan di mainta, cu yamadanan a cuminza drenta di bisiñanan indicando cu tin huma diki saliendo di un cas na e Residencia Vigia, cu ta situa riba e caminda di Paradera pa Jaburibari.

   A bin haya sa cu un dama cu tabata den e cas, a tende un explosion y algun rato despues a ripara cu candela a start den camber.  Huma diki aki a cuminza bay te pafo, y aki ta unda cu e dama a cuminza bay den panico y grita auxilio di bisiñanan.

   Bisiñanan a haci bon di core yama y bati alarma.

   Central di Polis a core manda patruyanan di Noord pa e lugar, y Centro di Alarma a dirigi un unidad di Brandweer di Tanki Flip.

   Na yegada, Polisnan tambe a nota cu ta trata di un candela unda huma diki tabata sali for di e dak di un seccion di un salon unda ta haci huña, hopi pega na un cas.

   Ambulance tambe a yega, debi cu e dama cu a bay den panico a cuminza sinti malo debi na tantisimo huma cu el a inhala.  El a bira hopi emocional tambe y a cuminza yora.

   Pa Bomberonan traha sin wordo stroba den e caya smal, Polisnan a seya e area pa personal di emergencia por traha.

   A compronde cu tanto e cas, y tambe e negoshi di Nails a sufri hopi daño.  A dura un poco pa e unidad di Ambulance por a maniobra den e caya smal, pa yega unda e victima tabata.  Pero a logra toch danki na profesionalismo di e chauffeur di Ambulance.  Asina a core atende e dama pa dune oxigeno, y tambe check si posiblemente el a bay den shock of no.

   Oficialmente autoridad no a informa si acaso e cas y e negoshi a kima completamente of no.  Tambe lo tin di bay investiga e causa principal di e candela.