Cancelacion di vuelonan pa Caribe door di KLM a afecta como 2.600 pasahero

Atake riba Venezuela

ORANJESTAD (AAN): For di Diasabra marduga cu a bira conoci cu militarnan Mericano a start un atake cu e mision principal pa captura president Nicolas Maduro na Venezuela, a pone cu dispatchernan di aerolinea KLM na Schiphol tuma un decision.

   Combina cu e NOTAM emiti pa mustra cu ta restringui vuelonan den espacio aereo Venezolano y tambe espacio aereo controla pa Curaçao Radar, esey a pone cu e aerolinea a cancela tur vuelo pa y for di Caribe Hulandes.

   Tur vuelo Diasabra pa Aruba, Curaçao, Bonaire, y St. Maarten a wordo cancela door di KLM, y en total como 2.600 pasahero a wordo afecta.  Esey ta loke KLM mes a indica den un boletin.

   KLM a indica cu a cancela nan vuelo pa Georgetown (Guyana), tambe Bridgetown (Barbados), y tambe Port of Spain (Trinidad and Tobago).

   E vuelonan pa Caribe Hulandes cancela door di KLM riba Diasabra tabata vuelonan KL-733, KL-735, KL-765, KL-775, y KL-783.

   Mientras tanto, riba Diadomingo si ya caba KLM a bula bek pa Caribe Hulandes, y a trata di acomoda lo mas hopi pasahero cu a keda stagna riba Diasabra.

    E organizacion di viahe TUI Fly tambe a cancela vuelonan pa Islanan ABC.  Nan a cancela 3 vuelo, y a afecta como 900 pasahero.  E tres vuelonan cancela aki tabata sold-out, como cu ta pasaheronan cu a viaha pa Pasco.