Cancelacion di vuelo preocupando hopi Turista na Aruba

jetBlue a duna nan siguiente cupo te 13 di Januari

ORANJESTAD (AAN): E atake di Merca riba Venezuela pa bay captura Nicolas Maduro, a bin net ora cu mayoria vuelo saliendo di Aruba ta yen-yen di hendenan cu a bin pasa Pasco y cambio di Aña Nobo.

   Riba Diasabra, ta monton di vuelo pa y for di Aruba a wordo cancela.  Awendia pa bo rebook riba otro vuelo, ta haci esaki principalmente via Internet of e app di Aerolineanan.

   Pero ya caba ta drentando informacion di varios bishitante na Aruba cu ta hayando problema pa por obtene cupo riba un siguiente vuelo.

   Un turista cu a keda afecta Diasabra debi cu su vuelo cu jetBlue a wordo cancela, ta bin realiza cu e siguiente vuelo cu e aerolinea ta ofrece cupo pa nan, ta te Diamars 13 di Januari 2026.

   E turista a bisa cu nan ta cuatro pasahero, y tambe un baby cu ta bay den scochi.  Pero jetBlue a indica cu e siguiente cupo pa 4 persona ta te dia 13 di Januari.

   E turista a skirbi riba social media, cu nan a trata tur e otro aerolineanan pa bula cualkier destinacion pa Merca pa asina por sali di Aruba, pero no ta hayando nada.  Nan no sa kico pa haci, pasobra nan tin di bay bek nan pais pa bay bek trabao, y tambe bay scol.

   Esaki ta un di e motibonan pakico semper pasaheronan tin di viaha cu Aseguro di Viahe pa por yuda cubri tur gastonan imprevisto cu ta presenta.  Pero tin e pensamento cu ora cu e espacio aereo habri bek, cu aerolineanan lo por pone extra vuelo djis pa yuda saca pasaheronan cu ta stagna aki.

   Hecho ta cu aerolineanan ainda no por a duna informacion concreto, te ora cu espacio aereo habri.  Y si acaso esaki habri, y nan tin bon bista di cantidad di pasahero stagna, nan por manda mas avion (of uza avion mas grandi, wide-body) pa yuda trece pasaheronan stagna den Caribe.