Cambio di e contract cu Gabinete Wever-Croes a haci a laga mas di 10 miyon extra pa Deporte

Parlamentario Endy Croes:

ORANJESTAD (AAN): Parlamentario Endy Croes ta splica cu e tabata tin e honor como Minister na aña 2023 pa tuma un decision y combence CBN (Canadian Bank Note) cu e ‘deal’ y contract cu AVP a negosha na aña 2011 no ta esun mihor pa deporte di Aruba. Por corda e tempo aya AVP a honra CBN cu un management fee 23.5% di e benta bruto di Lotto pa Deporte cual sigur ta un porcentahe demasiado halto.

A combence CBN cu mester re-negosha e contract:

Desde juli 2023 a forma un ekipo di 7 experto kendenan a negosha cu un team di CBN. Punto di salida tabata ta cu mester baha e management fee di 23.5% pa 8.25% cual porcentahe ta mas cerca di standardnan riba plataforma mundial. Esaki na final lo garantisa cu lo keda mas placa bek pa deporte di Aruba.

Den luna di Februari 2024 a logra firma e contract nobo

Despues di alrededor di 8 luna di negosacionnan fuerte a logra firma e contracto nobo den luna di Februari 2024. Prome cu e contracto nobo drenta na vigor Lotto y CBN mester a cumpli cu varios puntonan pa cu e traspaso oficial. Desde februari pa augustus 2024 a percura pa cumpli cu tur puntonan di acuerdo cu e contracto. Lotto pa Deporte Aruba a tuma rienda completo desde 1 di september 2024. Pues desde 1 di september 2024 e contracto nobo ta valido. E logro y e cambio di mas grandi den e contracto ta cu a reduci e ‘management fee’ di CBN cual tabata 23.5% di benta bruto pa 8.25%. Pues 15.25% EXTRA di e benta bruto di Lotto pa Deporte awo ta keda Aruba pa Deporte desde 1 di september 2024. Esaki sigur ta un logro historico di Gabinete Wever Croes 2. Pakico un logro importante paso esaki ta garantisa extra fondo pa deporte ta keda Aruba.

Aña 2025 e cambio aki a resulta den mas di 10 miyon extra

Lotto pa Deporte durante aña 2025 ta e prome aña cu nan lo conoce kico esaki ta significa na EXTRA fondo durante un aña completo. Lotto pa Deporte a surpasa 70 miyon den benta y e cambio di e porcentahe cu a logra den e contacto nobo a laga mas di 10 miyon “extra” pa Deporte na Aruba. Di e suma aki lo kita alrededor di 2.5 miyon cu ta bay na salario y mercadeo y por confirma cu Deporte adicional den 2025 lo tin garantisa 7.5 miyon EXTRA. Si mulitplica esaki cu un termino di un gobernacion di 4 aña e deal nobo aki ta garantisa 30 miyon adicional pa deporte den 4 aña. Pabien y danki na Gabinete Wever Croes 2 cu e vision y logro aki. Deporte ta wordo sirbi debidamente cu esaki.