Cada florin inverti den prevencion ta hopi mas eficiente y efectivo cu warda pa hende cay den droga

Randall Van Trigt, director financiero di HUNTO:

ORANJESTAD (AAN): Randall Van Trigt, Director Financiero di Stichting HUNTO, a destaca den entrevista cu DIARIO, e importancia di traha na un manera preventivo, den e casonan di adiccion.

   El a señala cu hopi biaha ta warda pa e situacion bira peor pa ayudo, p’esey nan tin proyectonan preventivo na scolnan, entre otro, EPB. Eynan nan ta duna lectura. Esaki ta un proyecto hopi leuk, pasobra tin profesionalnan di Hunto cu ta bay scol y por wak un cantidad di studiante cu ta bin na e Fundacion busca yudanza y combersa tocante un problema social.

   “Esaki ta proyectonan pa preveni muchanan cu ta cay den depresion, soledad, bay over na alcohol cu droga. E florin ey cu bo ta inverti den prevencion ta hopi mas eficiente y efectivo cu warda e persona aki cay den droga. Y tin hende cu pa bo kite di droga ta duro, ta full un proceso. Nos ta wak e na Colorado”, Van Trigt a señala. El a agrega cu e combinacion di scolnan, hubentud, mucha y hoben y Bemoeizorg cu ta pa takel esnan riba caya, vooral esnan ta biniendo, esey ta proyectonan cu ta bay tin a largo plazo resultadonan mas eficaz y eficiente pa Gobierno y pa Pais Aruba, den su totalidad.

Van Trigt a splica cu hunto cu Bemoeizorg nan ta bay traha un di dos version di e pipe plan  di 2025 pa 2029. Bemoeizorg ta pa e aña aki, pero unda cu e stichting kier bay ta pa takel e cuater pilar: Bemoeizorg ambulante zorg, Murale zorg, Nazorg. Esaki ta hopi importante y ta consisti di dos fase: un pa e parti ambulatorio, unda cu hendenan cu a recupera bin Hunto pa nan cana cu nan den e trayecto di nan bida,  pero tambe pa e clientenan di adiccion cu ta parti di e proyecto di Bemoeizorg di caya, drenta Colorado haya un begeleid di seis luna maximo. Despues, bay seis luna bao guia di personal di Hunto. Esaki ta conta pa tur e fundacionnan, segun señor Van Trigt.

E  begeleid ta hopi importante den futuro y e ta un di e proyectonan grandi pa 2026.