Informacion cu ta ’50 hende pa dia’ ta incorecto
- Personanan priva por busca 5 plachi maximo
ORANJESTAD (AAN): Tabatin confusion den pueblo ora cierto media a publica cu ta solamente 50 cita ta wordo atendi pa dia pa asina busca plach'i number.
Pero Meverly Romano kende ta vocero di Departamento di Impuesto, a coregi pa splica cu tur dia nan tin ’52 time-slots’ pa atende cita.
Y cada time-slot tin ‘x’ cantidad di hende cu ta wordo atendi, y pa dia ta 500 pa 600 hende ta presenta pa nan afspraak. Segun Impuesto, en total ta 650 pa 700 plach'i number ta wordo entrega pa dia. Pues e no ta 50 afspraak pa dia, pero mucho mas.
Cada 10 minuut tin un cita nobo (time-slot), y varios persona ta wordo atendi hunto durante e 10 minuut ey.
Romano a indica cu nan meta ta pa entrega tur dia entre 600 pa 700 plachi pa dia. Durante e siman aki nan ta vigilando e sistema di cita, y ta hasta busca feedback di e clientenan cu ya a haya plachi pa sa di nan experiencia. A base di tur esaki nan ta bin ta ahustando e cantidad di hende hayando cita.
Corda cu tin 92.835 plach'i number registra y di experiencia Departamento di DIMP sa cu no ta tur hende ta haci pago. Nan ta target pues 80% di e cantidad eynan, cu ta sali na un total di 74.268 plachi. Ora di ‘rond-af’ na 75 mil.
Awor DIMP su calculo pa reparti e plachinan den 6 luna di tempo, ta core pa haci entrega di 75 pa 80 mil den prome mitar di aña, pues cumpliendo cu tur automobilista cu a haci pago.
Lo keda vigila con e trend di pago ta sigui, y a base di esey si acaso ta necesario claro cu DIMP lo ahusta e cantidad di persona pa atende cada dia.
Y e dia lo yega cu DIMP ta informa Cuerpo Policial cu tur plachi ya paga a wordo reparti, y tur auto coriendo cu plachi bieu e momento ey lo ta moviendo ilegal riba caya. Pues esnan cu tin tur debe atrasa cu boetnan, lo tin di bay haci algo pa asina nan haya plachi color blauw di 2025-2029.
Pero toch corda bon cu Polis por para automobilista cualkier motibo, y despues di 31 di januari 2025 si bo no tin por lo menos mitar aña paga (nan ta controla via Computer di DIMP), lo bo haya un boet tambe e ora.
