Bunita procesion y Santo Sacrificio di Misa pa celebra Diadomingo di Rama

Na Pro-Cathedral San Francisco di Asis:

ORANJESTAD (AAN)-- Un bunita Santo Sacrificio di Misa a wordo ofreci, pa 11’or di mainta, na Pro Cathedral San Francisco de Asis, na Playa, pa celebra Diadomingo di Rama, cu ta e Dia cu e mundo Catolico ta recorda e entrada triunfal di Hesus di Nazareth, na Jerusalem.

   A inicia cu un procesion cu a sali for di Huki di Mama Maria, unda un cantidad di feligres hunto cu asistentenan di Misa, a acompaña Pastor Stanlislav, pa cana hunto y bin bek te e porta principal di e Templo, pa haci e entrada meymey di tur presente y despues a sigui cu e acto di bendicion di e palmanan cu e debotonan tabata tin lanta den man, ora e sacerdote a basha awa bendiciona.

Den e Santo Evangelio a recorda e momentonan dificil di golpi, coronacion cu sumpiña y humiliacion verbal di Hesus, E Mesias, prome cu El a wordo claba riba Cruz, y cu e hendenan tabata grita “Crucifik’e” y laga Hesus Barabas liber. E Sacerdote a haci un reflexion pa cada feligres pensa y sinti di cual banda e ta para como Cristian, y kico e mes ta sacrifica como yiu di Dios pa alcanza e bida cu Hesus.

   Pro-Cathedral tabata completamente yen di fielnan local cu nan famia y individual, y turistanan tambe. Esaki ta inicio di tur e ceremonianan cu ta evoca e bida, pasion y morto di nos Salbador, pa culmina Diadomingo di Resureccion, e Diadomingo 5 di April venidero.