Buki conmemorativo lo contene historia di trabaonan grandi cu frèrenan a haci na Aruba

Fabio Moreta di Stichting Huize de la Salle:

ORANJESTAD (AAN):  Fabio Moreta di Stichting Huize de la Salle, den un entrevista cu DIARIO, a compremi e historia di 62 Frère den 63 aña na Aruba. E frèrenan a contribui grandemente na nos comunidad riba tereno di labor, enseñansa, cultura, deporte y musica. Pero e storia completo lo ta den e buki conmemorativo cu e fundacion ta trahando.

   Prome cu añanan 60, Frèrenan a yuda forma e cuadro di enseñansa formando nos propio maestronan Arubiano. Segun señor Moreta, enseñansa a independisa mas prome cu entre otro e tereno di medicina y hospital. A tarda mas pa tin mediconan Arubiano cu maestronan Arubiano.

   E buki conmemorativo, un di e proyectonan di Stichting Huize de la Salle, lo contene mas o menos 200 pagina, lo contene datanan for di aña 1937 te cu aña 2000 na unda cu na mei, e ultimo 3 frèrenan a bay bek Hulanda. E buki lo contene hopi potret cu ta ilustra e trabaonan di e frèrenan na Aruba. Tambe den e documentario, cu ta e di tres proyecto, lo tin material audiovisual cu lo duna un miho bista de esaki.

   E buki, segun señor Moreta, lo ta den Hulandes y lo bay pa scolnan y institutonan educacional gratuitamente. Tambe tur esnan cu a contribui na e fondo pa realisa e proyecto aki, lo ricibi un copia, y e sobra lo por obtene na librerianan.