Boto cu 2 persona nabegando di Republica Dominicana pa Aruba awor ta perdi

Buskeda di 3 dia tabata envano

ORANJESTAD (AAN): Riba Diaranson siman pasa den oranan di anochi, un informe a drenta na Centro Operacional Maritimo (MOC) di Wardacosta di Caribe Hulandes, encuanto un boto cu dos persona ta perdi riba lama.

   E dos hombernan, cu ta un Mericano y un Hondureño, a sali Diamars merdia for di Republica Dominicana rumbo pa Aruba, y te cu e anochi ey ainda nan no a yega.

   Ora cu e haya e informe aki, ya tabata anochi y bista ta limita, y pesey Centro MOC no a saca ningun unidad y a prefera warda pa mainta habri pa aisna saca e avion di Wardacosta pa start cu un buskeda.

   A base di e ruta cu a ser duna cu nan lo nabega, Centro MOC a traha un area di posibel buskeda pa e tripulantenan di avion por check den e areanan ey.

   E buskeda aki a start riba Diahuebs, y en total a dura tres dia.  Pero e buskeda no a duna ningun resultado positivo.  Tambe a transmiti NAVTEXT y informenan di UMIBS na demas botonan cerca di e area di buskeda, pero no a duna ningun informacion nobo riba e boto perdi y e dos hombernan.

   Pesey Wardacosta di Caribe Hulandes a tuma e decision pa finaliza e buskeda activo aki.  Pero toch durante patruyahenan regular, Wardacosta lo sigui keda vigila y busca e boto perdi, por si acaso.  E Centronan di Coordinacion di Rescate den area, tambe ta na altura di e boto perdi.