Bonita Upholstery and Mattress den Caya Betico Croes a kima completamente

Alarma den marduga

• E ta conoci tambe como ‘Hotel Used Furniture Store’ 

ORANJESTAD (AAN): Banda di 4:00 am di Diamars marduga, autoridadnan a cuminza ricibi informacion cu tin un edificio na candela den e caya di Caya Betico Croes bay nort pa Sero Blanco, poco panort di Win Hing Laundromat.

   E pida caminda aki na comienzo tambe tin adres cu ta carga e nomber di Caya Betico Croes.  E edificio na candela tabata Caya Betico Croes 193-E, y e edificio tin e nomber di ‘Bonita Upholstery and Mattress NV’ y ta uza e nomber di ‘Hotel Used Furniture Store’ tambe.

   Bomberona a yega y a bin topa cu vlamnan grandi ta saliendo for di dak na halto, pues ta un ‘uitslaande brand’ aki.  Bombero di Tanki Flip y tambe di Oranjestad a yega y mesora a cuminza basha awa.  Sinembargo e candela tabata enfocando mey-mey di e edificio, y huma diki tabata bay pabao e momento ey.  Polis a yega y a blokea e caminda aki for di Caya Betico Croes te na e cruzada panort di Rooi Manonchi.

   E tabata un candela cu a expande rapidamente, mirando e contenido cu ta palo, plywood, muebles, etc.

   Diferente unidad di Brandweer mester a yega pa asina combati e candela cu a dura te den oranan di mainta. NV Elmar a hunga su rol tambe di kita e coriente cu ta importante pa e bomberonan.

   Importante tabata pa contene e candela y evita esaki expande na e otro negoshinan eynan mes, incluyendo New Tire Repairshop parti pazuid, y tambe e negoshi di AGD Automotive & Quality Parts banda panort.

    Den ora di mainta, por a mira personal forensico di BFTO, tambe DTI y otro departamentonan na e lugar.  Team logistico di Crisis Management Office (CMO) tambe tabata presente.  Mientras Bombero a sigui basha awa pa fria tur e edificio.  E doñonan mes no ta na Aruba pa e dianan di fiesta aki.

   Investigacion lo mester por saca afo kico a start e candela.