Bon intento pa Arubianonan cu ta studiando Aviacion bin core stage na Aruba

Director sr. Kelly: DAC ta yegando na un acuerdo cu Hulanda:

ORANJESTAD (AAN) Señor Edwin Kelly, director di Departamento di Aviacion Civil (DAC), den entrevista cu DIARIO a expresa cu enberdad DAC tin hopi reto, pero nan ta purba mitiga esakinan mas tanto posible, y pa nan por cumpli cu e tareanan pa garantiza seguridad di aviacion.

“Un di e retonan ta pa haya personal califica, y esey mundialmente ta un reto y na Aruba no ta un excepcion. Akinan tambe den e industria aki, nos ta rekeri personal hopi, hopi specializa”, señor Kelly a señala.

El a señala tambe cu tin biaha e departamento mes ta forma nan, pero tambe nan mester haya inspectornan y otro personal cu tin e experiencia necesario caba, y personal asina no ta facil pa haya.

“Nos ta boga sigur, pa studiantenan cu ta interesa den e ramo di aviacion pa opta pa e direccion ey. E ta un ramo hopi dinamico, hopi great, hendenan cu ta traha cu nos ta pasobra nan ta stima aviacion. E ta bira un ‘life style’. Loke tambe ta importante ta cu den e mundo di aviacion tin diferente direccion: tin diferente specializacion, bo por traha como piloto, mecanico di avion, hurista aeronautico, y diferente ramo den aviacion cu por specializa den dje. Tambe tin diferente oportunidad, no solamente den Directie Luchtvaart, pero tambe cerca Meteo, cu aerolineanan, Aeropuerto, na ANSA, cu por cierto e siman aki ta cumpli diez aña di existencia”, señor Kelly a indica.

El a agrega cu ta importante pa menciona cu e aña aki DAC ta yegando na un acuerdo cu Hulanda. “Cu nos por brinda un pakete di asistencia, pa studiantenan Arubiano, cu ta studiando specificamente den aviacion, por haya apoyo pa core stage na Aruba of pa studia na Aruba; nos ta bezig cu ne”, señor Edwin Kelly a duna di conoce.

Finalmente señor Kelly a expresa cu hopi hende cu ta den e industria di aviacion no ta sali mas di dje door di e pasion cu nan tin pa esaki.