Bon boluntad y positivismo a marca 2024!

Na 2024 Aruba a entrega mundo e prueba di Arubianismo

• Problemanan mundial serio a bira logro di e union Arubano 2024
• Caranan di 2024 ta entrega na futuro e deber pa mantene paz y union 

ORANJESTAD (AAN) Cu Aruba a conoce logronan enorme durante ultimo aña y hasta a haci cu Reino a exigi continuacion di e rumbo cu Aruba a encamina, ta conoci.

Sinembargo, e pakete di logronan Arubano ta asina grandi cu den porta di Pasco tin tur motibo pa Aruba entrega mundo e prueba di loke un ambiente di positivismo cu a anima participacion di tur ciudadano, ta duna como resultado.

DIARIO awe ta entrega su lector e mensahe cu trabou importante na tur parti di Aruba, a duna como mensahe cu ta invita Aruba pa uni na e pesebre y cende luz di fiesta pa celebra Pasco.

     EVELYN WEVER-CROES:

          LOGRO NACIONAL

           DI FUTURO NOBO

Eleccion na Aruba a suscribi loke ya tabata notable na Aruba, cu a entrega mundo e ehemplo con por transforma realidad di un pais y crea un mañan den cual generacionnan nobo, tin e base pa sigui pa traha pa nan pais.

Aruba na 2024 a conclui e tarea dificil pa bolter realidad di e pais, cu a logra su superacion y pone solo briya cu speranza nobo.

Durante eleccion 2024, Aruba a sostene tur indicacion cu DIARIO a ricibi for di Pueblo di Aruba cu Evelyn Wever-Croes tabata un lider excepcional cu a percura pa cambio grandi.

Na 2024 Aruba, representa pa su Prome Ministro Evelyn Wever- Croes, a cosecha aplauso y a duna prueba cu un pais chikito y sin reserva por cambia su destino.

Awe na momento cu ta honra Prome Ministro Evelyn Wever-Croes como e lider cu a hiba Aruba na un futuro nobo hunto cu su Gabinetenan, ta yama danki na su familia cu a permiti e Prome Ministro di Aruba pa alcansa e logro grandi pa Aruba.

      JACCO VROEGOP

       HOSPITAL A BIRA

      SPERANZA NOBO

             PA SALUD!

Uno di e problemanan mas serio cu Aruba mester a enfrenta na 2017, tabata e situacion di su hospital, cu tabata nucleo di desesperacion pa personanan cu mester a ricibi cuido medico.

Horacio Oduber Hospital tabata un problema serio pa Aruba y hasta tabata un realidad cu Arubianonan tabata teme pa nan bida mientras cu personal tabata na careda.

Den e situacion aki Ministro di Salud Publico, Dangui Oduber, a entrega na Aruba un cara nobo pa maneha e centro di salud di Aruba.

Awe Aruba ta siguii crece riba tereno di Cuido Medico, cu progreso enorme na e hospital cu continuamente ta comparti mensahenan di speransa cu Aruba.

Motibo awe pa pone e Director di Hospital señor Jacco Vroegop, como uno di e caranan di logro di Aruba na 2024.

       TITO BOLIVAR:

  PROYECTO MURAL

        SAN NICOLAS

Pa turismo como sector economico por sigui desaroya mester di inventividad. Esaki sigur a bini dilanti den e proyecto cu a keda presenta na San Nicolas pa e Arubiano, Tito Bolivar.

San Nicolas cu su proyecto unico a habri porta algun aña atras y na 2024 den sondeonan di DIARIO a duna prueba di ta uno di e atraccionnan special cu Aruba ta ofrece su turistanan den epoca moderno.

Un turista ta busca un pais pa loke e pais ta ofrece di su historia pero den temponan moderno mas y mas ta busca expresionnan artistico cu ta uni na e color local di un pais.

Na 2024 un aporte grandi a wordo na turismo na Aruba pero a culmina pa San Nicolas, caminda bishitantenan di Aruba ta cera conoci cu e expresion artistico enorme di Arubianonan.

Motibo pa reconocimento 2024 na Tito Bolivar pa su contribucion na adelanto di Aruba.

      NORMAN THIJSEN

        PRESIDENTE DI

           FUNDACION

            SAVANETA

Uno di e problemanan social mas grandi di Aruba, sigur ta vivienda manera continuamente ta bini dilanti.

Na mes momento e necesidad grandi pa cas na Aruba ta haci cu e toke netamente Arubano ta bay perdi den e construccion cu urgencia pa mas cas ta produci.

Uno di e logronan mas grandi na Aruba na 2024 ta e proyecto di Fundacion Savaneta, cu Norman Thijsen como Presidente.

Dinamismo a uni cu e parti di nacionalismo y union entre Arubianonan pa yuda otro den sobrevivencia di problema y solucion pa sigui dilanti.

Na 2024 aplauso ta bay pa e dinamismo desplega pa Fundacion Savaneta, dirigi pa e ciudadnao Norman Thijsen, cu ta entrega uno di e solucionnan mas importante pa e problema grandi di vivienda na Aruba pero tambe e forma pa mantene e loke historia a entrega Aruba na uno di e sitionan caminda bishitanante ta cera conoci cu e cara tipico di Savaneta  na Aruba.

        FUNDACION

      MOVEMENTO

            TA BIDA

Uno di e problemanan grandi cu Siglo 20 cu su adelantonan medico y cientifico a laga atras pa mundo, tabata e forma cu edad promedio ta subi y e necesidad pa entrega oportunidad pa e grandinan pa nan por goza di e oportunidad cu bida mka largo ta brinda.

Con duna contenido mas largo y di calidad na e grupo creciente di grandinan den comunidad?

Esaki ta exactadamente e base di Movemento ta bida, despues cu cientificamente a keda proba cu movemento ta nifica un mihor calidad di bida.

Na 2024 por a mira cu no ta trata solamente di movemento social, pero tambe di e forma cu hasta den proyectonan den agricultura, grandinan por move y duna nan aporte.

Na ciere di 2024 tin tur motibo pa aplaudi e logronan grandi di Movemento ta Bida cu a duna contenido na bida y motibo pa grandinan realmente por participa como ciudadano na Aruba!

Den proximo edicionnan sigur lo funa atencion na e proyectonan di Hoffi Bario, uno di e proyectonan mas ingenioso cu Aruba a conoce.