Biblioteca Nacional ta organisa curso riba con pa skirbi un bon storia

ORANJESTAD (AAN):  Kico ta haci un bon storia? Kico ta pone cu e lector no kier stop di sigui lesa?

Pakico tin storia ta asina excitante, mientras cu otro nan ta pone bo pega soño? Sea ta un buki pa mucha, of un buki pa adulto, n’e curason di tur bon buki, tin un storia bon hinca den otro. Con pa hinca esaki na un manera bon den otro?

            Na november, autor local Vi Frank Jr. ta duna un curso – organisa dor di Biblioteca Nacional Aruba – tocante di e topico interesante aki. Autor Vi Frank Jr. tin dos buki publica na su nomber, esta ‘Damnatio ad Bestias’, e prome thriller skirbi na Papiamento, y tambe ‘Outpost Alto Vista and Other Cosmic Horrors from Aruba’, un coleccion di 5 storia skirbi na Ingles den e genero di Cosmic Horror.             Tambe sr. Frank Jr. a skirbi y produci varios coleccion di storia di dje y varios autor local, entre otro ‘Maraca’, ‘Halado’, y ‘Antologia Arubano’.

            Tur hende tin un storia interesante pa conta, hopi tin gana di skirbi un buki – sea ficticio of di bida real – pero no hopi ta conoci cu e diferente tecnicanan con pa pone nan storia den un forma excitante ariba papel. Desde 4 di november awo, autor local Vi Frank, lo duna tur es’nan interesa un bista ariba kico ta come y bebe den e mundo fascinante di hinca storia den otro. E meta di e curso aki, ta pa na final e participante bay cas c’un ‘toolbox’ yen di herment con pa logra nan meta, esta hinca un bon storia den otro cu ta pone nan lectornan pasa oranan excitante.

            Aunke e ta keda algo importante, den e curso aki no lo pone atencion na gramatica, ortografia, etcetera. Participantenan por skirbi con cu nan kier, den nan idioma preferi, sea ta Papiamento, Ingles, Hulandes, o Spaño, di cualkier tema of genero di nan preferencia. Locual ta bay wordo poni hopi atencion riba dje ta varios tecnica con pa gara atencion dje lector di tal forma cu e no kier laga los mas.

            Den e curso lo focus entre otro con pa crea personahenan interesante; con pa stimula imaginacion dje lector; di cua punto di bista lo conta e storia; con pa hinca e secuencia y escenanan den otro di tal forma cu e storia ta keda interesante y muy en particular, con pa evita erornan cu nos tur como escritor ta haci hopi biaha.

            E curso aki lo ta dialuna di 5or pa 7or, ariba dialuna atardi: e dianan: 4 y 6, 11, 18, y 25 di november y tambe 2, 9, 16 di december 2024.